Memlekettik tildi úıretý ortalyqtarynyń jumysyn júıelendirýdiń uıymdastyrýshylyq ádisterine arnalǵan konferentsııa ótýde
ASTANA. 21 qazan. QazAqparat /Qanat Mámetqazyuly/ - Búgin Astanada Sh. Shaıahmetov atyndaǵy Tilderdi damytýdyń respýblıkalyq úılestirý-ádistemelik ortalyǵynda
«Respýblıkadaǵy memlekettik tildi úıretý ortalyqtarynyń jumysyn júıege túsirýdiń uıymdastyrýshylyq jáne ádistemelik máseleleri» taqyrybynda ǵylymı-praktıkalyq konferentsııa bolyp ótti.
Konferentsııanyń negizgi maqsaty - elimizdegi memlekettik tildi úıretý ortalyqtarynyń jumysyn júıege túsirý jáne olarǵa ǵylymı-ádistemelik qoldaý kórsetý bolyp tabylady. «Tilderdi damytý men qoldanýdyń 2011-2020 jyldarǵa arnalǵan memlekettik baǵdarlamada tilderdi oqytýǵa, osy ispen aınalysyp jatqan ortalyqtar jumysyn úılestirýge úlken kóńil bólinip otyr. Óıtkeni, tildi oqytý tildiń qoldanysyn qalyptastyrý bul til úıretý úderisimen tyǵyz baılanysty ári bir birinsiz júzege aspaıtyn másele. Sondyqtan da, bizdiń aldymyzda elimizdegi til saıasatyn júrgizýge qatysty jaýapkershilik asa aýqymdy», -dedi jıyndy ashyp sóz sóılegen QR Mádenıet mınıstrligi Til komıtetiniń tóraǵasy Sherýbaı Qurmanbaıuly. Onyń aıtýynsha, osyǵan deıin Til komıteti ókiletti organdardy qatystyra otyryp, arnaıy komıssııa jasaqtaǵan bolatyn. Atalmysh komıssııa óńirlerdegi tilderdi oqytý ortalyqtarynyń jumysymen tanysyp shyqty. Búgingi jıyn sol komıssııa tarapynan anyqtaǵan máselelerdi talqyǵa salýmen qatar, aldaǵy ýaqytta úılesimdi jumystar atqarý máselesin sóz etpek.
Konferentsııa jumysyna belgili ǵalymdar, oblystardyń jáne Astana men Almaty qalalarynyń til úıretý ortalyqtarynyń basshylary men ádiskerleri, buqaralyq aqparat quraldarynyń ókilderi qatysty.
Jıyn barysynda til úıretý ortalyqtarynyń jumysyn júıege túsirý, memlekettik tildi oqytýdaǵy jobalaý tehnologııasy men memlekettik tildi qashyqtan oqytý ádistemesin jetildirý, áleýmettik lıngvıstıkanyń memlekettik tildi oqytýdaǵy rólin kórsetý, memlekettik qyzmetshilerge memlekettik tildi oqytýdaǵy oqý-ádistemelik keshenderdi saraptaý, t.b. mańyzdy máseleler talqylandy. Konferentsııa qorytyndysy boıynsha memlekettik tildi úıretý ortalyqtarynyń jumysyn júıege túsirý jónindegi usynystar ázirlendi.
