Memlekettik tildi úırenýge degen jappaı yqylasty oıatý úshin til úıretetin oqytýshylarǵa áli de biraz ter tógýge týra keledi - Til komıtetiniń tóraǵasy
ASTANA. Qyrkúıektiń 15-i. QazAqparat /Marlan Jıembaı/ - Búgin elordada jańa ınnovatsııalyq oqytý júıeleri jáne memlekettik tildi jedeldete oqytý máselelerine arnalǵan respýblıkalyq ǵylymı-tájirıbelik konferentsııa óz jumysyn bastady.
Alqaly jıyndy ashqan QR Mádenıet mınıstrligi Til komıtetiniń tóraǵasy Baýyrjan Omarov taıaýda ǵana Úkimet músheleriniń nazaryna usynylǵan «Tilderdi qoldaný men damytýdyń 2011-2020 jyldarǵa arnalǵan memlekettik baǵdarlama jobasyna oraı BAQ betterinde 200-den astam maqalalar jaryq kórgenin aıta kelip, atalǵan baǵdarlamada 4 maqsat kózdelgenin tilge tıek etti. «Onyń birinshi maqsaty memlekettik tildi Qazaqstannyń halqyna úıretýdi mindetteıdi», dedi ol óz sózinde
Jıynǵa qatysýshylarǵa sońǵy 10 jylda memlekettik tilde úırenýde ilgerileýshilik bar ekendigin atap kórsetken B.Omarov «sheneýnikterdiń tili syndy, soltústiktiń tili eptep qazaqylandy, qujattamany qazaqsha júrgizý birshama qalyptasty», deı kelip, osy ýaqytqa deıin atqarylǵan jumystardy odan ári jandandyrýǵa shaqyrdy.
Sonymen qatar ol til úırenýdi áli kúnge deıin negizgi mindet, negizgi paryz sanamaı otyrǵan da azamattar bar ekendigine qynjylys bildire kelip, «olar áli de tildi meńgermeýge tyrysyp baǵada. Óıtkeni qoǵamda áli kúnge deıin memlekettik tildi qajetsinbeı-aq jumys isteıtin býyn bar, ony jasyrýǵa bolmaıdy. Endi sol psıhologııany joıý úshin, tildi úırenýge degen jappaı yqalasty oıatý úshin til úıretetin oqytýshylarǵa áli de biraz ter tógýge týra keledi», dedi.
Qazaqstan halqy tilderiniń festıvali aıasynda ótip jatqan konferentsııany QR Mádenıet mınıstrligi Til komıtetiniń Sh.Shaıahmetov atyndaǵy Tilderdi damytýdyń respýblıkalyq úılestirý-ádistemelik ortalyǵy uıymdastyryp otyr. Atalǵan sharaǵa respýblıkadaǵy til oqytý ortalyqtarynyń basshylary men ádiskerleri qatysýda.
