Memlekettik tildi oqytýshylardy yntalandyrý úshin «Til mereıi» respýblıkalyq sharasy ótedi - QR Mádenıet jáne sport mınıstrligi

ASTANA. QazAqparat - Eli Táýelsizdiginiń 25 jyldyǵyna oraı Qazaqstan Respýblıkasy Mádenıet jáne sport mınıstrligi Tilderdi damytý jáne qoǵamdyq-saıası jumys komıteti ústimizdegi jyldyń 24 maýsymynda «Til mereıi» respýblıkalyq sharasyn ótkizedi, dep habarlady vedomstvonyń baspasóz qyzmetinen.

Sharanyń maqsaty - memlekettik tildi turǵyndarǵa úıretetin oqytýshylardyń kásibı biliktiligin jetildirý, onlaın ádisimen ozyq tájirıbelerdi almasý jáne memlekettik tildi oqytý ortalyqtarynyń oqytýshylaryn yntalandyrý.

Qostanaı oblysy Tilderdi oqytý ortalyǵynyń bazasynda ótetin sharaǵa ádisker-ǵalymdar, til mamandary, til úırenýshiler, Astana, Almaty qalalary jáne oblys ortalyqtaryndaǵy memlekettik tildi oqytý ortalyqtarynyń oqytýshy ádiskerleri qatysady.

Shara barysynda ádisker-ǵalymdar memlekettik tildi oqytýdyń tıimdi tehnologııalary jáne ádis-tásilderimen bólisip, panoramalyq sabaqtarmen qatar onlaın rejıminde sheberlik sabaqtaryn kórsetedi.