Memlekettik tildi damytýdyń aldaǵy baǵdarlamasynda kemshilik ketpeýi úshin buny birneshe mınıstrlikter birigip ázirleýi tıis -M. Qul-Muhammed
ASTANA. Naýryzdyń 19-y. QazAqparat /Qanat Mámetqazyuly/ - Memlekettik tildi damytýdyń aldaǵy baǵdarlamasynda kemshilik ketpeýi úshin buny birneshe mınıstrlikter birigip ázirleýi tıis. Búgin QR Parlamenti Májilisinde ótip jatqan «Memlekettik til - el birliginiń kepili» atty ǵylymı konferentsııa barysynda baıandama jasaǵan QR Mádenıet mınıstri Muhtar Qul-Muhammed osylaı málim etti,
dep habarlaıdy QazAqparat.
«Memlekettik tildi damytýdyń aldaǵy on jylynda atqarylatyn sharalar negizgi 11 baǵytqa toptastyrylyp otyr. Sonyń ishinde birinshi baǵyty - balabaqshadaǵy qazaq tilin úıretý máselesi bolyp tabylady. Bul baǵyttaǵy sharalar Elbasynyń tapsyrmasymen ázirlenip jatqan «Balapan» baǵdarlamasymen sáıkestendirilip, jańa jumys josparlary belgilenetin bolady. Soǵan sáıkes, biz balabaqshadaǵy qazaq tilin oqytý máselesin, ásirese ózge ult ókilderi tárbıelenetin balabaqshadaǵy qazaq tilin oqytýǵa erekshe nazar aýdarylady», dedi M. Qul-Muhammed.
Sonymen birge, mınıstr bıylǵy jyly mejesi aıaqtalatyn tilderdi damytý baǵdarlamasyna toqtala otyryp, onda jetken jetistikter de barshylyq ekendigin, biraq kemshilikter de bolyp turǵanyn jetkizdi. «Aldaǵy onjyldyqta ótken kezeńdegi kemshilikterdi boldyrmaý, oǵan jol bermeý qajet, al bunyń birden bir tásili - baǵdarlama bir ǵana mınıstrlik tarapynan ázirlenbeýi kerek. Buǵan birneshe mınıstrlikter atsalysqany ıgi, onyń ishinde Bilim jáne ǵylym mınıstrligi keńinen aralasýy shart. Bul rette, aldaǵy baǵdarlamada biz balabaqshadaǵy, mekteptegi, JOO-daǵy qazaq tilin oqytý máselesine erekshe kóńil bóleıik dep otyrmyz. Óıtkeni, tildi meńgerý adamnyń jas kezinde áldeqaıda tıimdi de sińimdi bolady», dedi mınıstr.
