Memlekettik tildi damytý jáne qoldaný aıasyn keńeıtý máseleleri talqylandy - Kóliktegi ІІD
ASTANA. 3 jeltoqsan. QazAqparat. Jýyrda QR ІІM Kóliktegi ishki ister departamentiniń kishi májilis zalynda departamenttiń oblystardaǵy bólimsheleriniń memlekettik tildi damytý bólim-bólimsheleri qyzmetkerleriniń «Memlekettik til - qyzmet tili» atty semınar-keńesi bolyp ótti, dep habarlaıdy QR ІІM memlekettik til jáne aqparat bólimi. Oǵan Kóliktegi ishki ister departamenti bastyǵynyń orynbasary polıtsııa polkovnıgi Eshimov Janatbek Aqylbekuly tóraǵalyq etti.
Til - halyqtyń altyn dińgegi. Óz-ózin syılaı biletin árbir halyq aldymen óziniń týǵan ana tilin syılap, ony maqtan tuta bilý kerek. Óıtkeni, halyqtyń tarıhy, danalyǵy, jalyndy óleń-jyrlary men altyn shejiresi sol halyqtyń tilinde jazylyp, sol tilde urpaqtan urpaqqa mura bolyp qalýda.
Búgingi tańda eshkimdi qazaq tilin bilýdiń máni zor ekendigine úgittep, májbúrleýdiń qajeti shamaly.
Memlekettik ult saıasatynyń ajyramas bir bólshegi retindegi til saıasatynyń basym baǵyty - memlekettik tildi órkendetý.
Memlekettik til saıasatyn júzege asyrý sóılegen sózimizden emes, istegen naqty isterimizden kórinedi.
Kóliktegi ishki ister departamenti Memlekettik til jáne aqparat basqarmasynyń negizgi maqsaty Qazaqstan Respýblıkasynyń memlekettik til saıasatyn, ıaǵnı Konstıtýtsııa, «Qazaqstan Respýblıkasyndaǵy til týraly» Qazaqstan Respýblıkasynyń Zańyn, Mınıstrliktiń buıryǵyn jáne Kóliktegi ІІD bastyǵynyń talaptaryn oryndaý jáne júzege asyrý barysynda búginge deıin atqarylyp kelgen jumystardy úılestirip, olardy áli de jetildire túsý.
«Qazaqstan Respýblıkasyndaǵy til týraly» Qazaqstan Respýblıkasy Zańynyń talaptaryn oryndaý maqsatynda Kóliktegi ishki ister departamenti men onyń qurylymdyq bólimshelerinde memlekettik tildi damytý máseleleri boıynsha jumys júıeli júrgizilýde.
Kóliktegi ishki ister departamenti Memlekettik til jáne aqparat basqarmasy bastyǵynyń orynbasary polıtsııa podpolkovnıgi Maqpal Qusmanqyzy Kósherbaevanyń semınar-keńeste «Kóliktegi ishki ister departamentindegi memlekettik tildiń ahýaly» taqyrybyndaǵy baıandamasynda atap ótkendeı, basqarmanyń shtattyq sany - 10, al 25 jelilik ishki ister bólimderiniń onynda memlekettik tildi damytý tobynyń ınspektory bar. Olar baspasóz qyzmetiniń jumysyn qosa atqarady. Jelilik ishki ister bólimderinde attestatsııalanǵan ınspektor laýazymyn basqa qyzmetterge paıdalaný jaǵdaılary kezdesedi.
Sonymen qatar, departamentte qyzmetkerlerge memlekettik tildi úıretý jumystary keń aýqymda júrgizilýde. Maqpal Qusmanqyzynyń aıtýynsha, Ortalyq apparatta 167 qyzmetker 10 oqý tobynda oqıdy (3 bastaýysh topta - 49 qyzmetker, 5 jalǵastyrýshy topta - 89 qyzmetker, 2 tereńdetilgen topta - 29 qyzmetker bar).
Degenmen, semınar-keńes barysynda anyqtalǵandaı, qyzmetkerlerdiń sabaqqa qatysýy áli de syn kótermeıdi, bul másele basqarma basshylyǵynyń qatań baqylaýynda. Ol aı saıyn selektorlyq keńeste tyńdalyp otyrady, qyzmetterge qyzmet basshylaryń baqylaýǵa alýy úshin tizim joldanady.
Semınar-keńes barysynda jergilikti jerlerdegi KІІD bólimshelerindegi memlekettik tildi damytý jáne onyń qoldanylý aıasyn keńeıtý baǵytynda atqarylyp jatqan jumystary sarapqa salyndy. Jumys barysynda týyndap qalar problemalar talqylanyp, qol jetkizilip jatqan jetistikter kótermelendi.
Baıandamashylar ózderi jaýapty bólinisterdegi memlekettik tildi damytý baǵytynda atqarylyp jatqan jumystar jaıly baıandap, KІІD bastyǵynyń orynbasarypolıtsııa polkovnıgi Eshimov Janatbek Aqylbekulynyń suraqtaryna jaýaptar berdi.
