Memlekettik tildi damytý Prezıdenttik qoryna jańa dırektor taǵaıyndaldy
ASTANA. Sáýirdiń 7-si. QazAqparat- Memlekettik tildi damytý Prezıdenttik qoryna jańa dırektor bolyp Azat Sháýeev taǵaıyndaldy. Memlekettik hatshy - Syrtqy ister mınıstri Qanat Saýdabaev tóraǵalyq etetin Qordyń Qamqorshylyq keńesi búgin osyndaı hattamalyq sheshim qabyldady,
dep habarlady Qordyń baspasóz qyzmetinen.
Azat Sháýeev 1969 jylǵy 9 aqpanda týylǵan. 1994 jyly Abaı atyndaǵy Almaty memlekettik ýnıversıtetiniń fılologııa fakýltetin bitirgen. Osy laýazymǵa taǵaıyndalǵanǵa deıin Qor dırektorynyń birinshi orynbasary bolyp qyzmet istegen. Buǵan deıin QR Mádenıet jáne aqparat mınıstrliginde qyzmet istep, «Nur Otan» HDP Ortalyq apparaty Aqparattyq-taldaý bóliminiń meńgerýshisi, QR Premer-Mınıstriniń Keńsesi Áleýmettik-mádenı damý bóliminiń bas sarapshysy, Almaty qalalyq ákimdiginde Qazaqstan halqy shaǵyn Assambleıasymen jumys bóliminiń meńgerýshisi, Almaty qalasynyń Іshki saıasat departamenti Qoǵamdyq-saıası bóliminiń meńgerýshisi, Almaty qalalyq ákimshiliginiń Til basqarmasynda onomastıka, termınologııa jáne til mádenıeti bóliminiń bas mamany qyzmetterin atqarǵan.
Osy qyzmette Azat Sháýeev saıasatker Berik Ábdiǵalıevti aýystyrdy.
Anyqtama úshin: Memlekettik tildi damytý Prezıdenttik qory Memleket Basshysy Nursultan Nazarbaevtyń bastamasymen 2008 jyly 5 qyrkúıekte quryldy.
Qor jumysynyń negizgi basymdyǵy - Qazaqstannyń ulttyq qazynasy, qazaq halqy mádenıetiniń temirqazyǵy sanalatyn qazaq tilin damytýǵa jan-jaqty jáne barynsha yqpal etý.
Qordyń negizgi maqsat-mindeti qazaq tilin damytýǵa baǵyttalǵan qoǵamdyq jobalarǵa qoldaý kórsetip, demeýshilik jasaý arqyly ana tilimizdiń mártebesin arttyrýdy yntalandyrý bolyp tabylady.
Óz qyzmetiniń negizgi baǵytyna saı Qor ótken jyly Úkimettik emes uıymdar men jekelegen tulǵalardyń 30-dan asa jobasyna, olardyń qatarynda qazaq tilin oqytýdyń avtorlyq baǵdarlamalaryna, qazaq tildi ınternet-saıttar ashý jobalaryna, ár alýan jarnamalyq-nasıhat aktsııalaryna, oqý-ádistemelik quraldar men sózdikter shyǵarý jumystaryna qoldaý kórsetti.
Qordyń Joǵarǵy basqarýshy organy Quryltaıshylar jınalysy bolyp tabylady. Onyń quramyna QR Tuńǵysh Prezıdenti Qory, Dúnıejúzi qazaqtary Qaýymdastyǵy, Qazaqstan Jazýshylar Odaǵy, Ulttyq ǵylym akademııasy, Qazaqstan halqy Assambleıasynyń Respýblıkalyq qory kiredi.
