Memlekettik tildi damytý qory men Abaı murajaıy yntymaqtastyq týraly memorandýmǵa qol qoıdy
Mundaǵy maqsat - qazaq halqynyń mádenı, ádebı, rýhanı jetistikterin keńinen nasıhattaý, ınternet keńistiginde memlekettik tildiń qoldaný aıasyn keńeıtý.
Yntymaqtastyq memorandýmynyń aıasynda «Abaialemi.kz» onlaın entsıklopedııalyq portalyn birlesip tolyqtyrýǵa, Uly Abaıdyń ómiri men shyǵarmashylyǵy, aqyn shákirtteriniń, zamandastarynyń estelikteri, abaıtanýshylardyń Abaıǵa arnalǵan eńbekteri, shyǵarmalary jaıynda materıaldar jınaý jumystaryn júzege asyrý, aqparattarmen almasý jáne birlesken bastamalardy ázirleýge qatysý kózdeledi.
«Abaialemi.kz» - Abaıdyń barlyq shyǵarmalary, aýdıo, vıdeo materıaldar jınaqtalǵan portal. Onlaın portalda Uly Abaı dáýiri, onyń aqyn shákirtteri jaıly materıaldar, zamandastarynyń estelikteri, abaıtanýshylardyń Abaıǵa arnaǵan eńbekteri men shyǵarmalary jáne taǵy basqa aqparattar ornalastyrylǵan.
Portalda tuńǵysh qazaq roman-epopeıasy bolyp tanylǵan «Abaı joly» kóptomdyq tarıhı romanynyń álem halyqtarynyń tilderindegi aýdarma nusqalary ornalastyrylǵan. Romandy saıttan onlaın oqýǵa jáne tyńdaýǵa bolady.
Internet portal 2015 jyly Qazaqstan Respýblıkasynyń Prezıdenti N.Á.Nazarbaevtyń bastamasymen óziniń «Jibek joly» beıbitshilik syılyǵyna alǵan qarjysyna ázirlendi. Elbasy osy atalǵan syılyqtyń bir bóligin áleýmettik jobalardy júzege asyrý úshin Memlekettik tildi damytý qoryna bergen bolatyn.
Jýyrda «Abaialemi» mobıldik qosymshasy iske qosyldy. Endi smartfonda «Abaı joly» qazaq, orys jáne aǵylshyn tilderinde bar. Mundaı patrıottyq baǵdarlama endi barlyq «Androıd» paıdalanýshylar úshin qoljetimdi. Memorandým ınternet qaýymdastyǵynda Abaı murasyn ári qaraı nasıhattaýǵa yqpal etetin bolady.
