Memlekettik tildi damytý qory «Batyrlardan ónege» mánerlep oqý saıysyn ótkizdi
Bul týraly qordyń baspasóz qyzmetinen habarlady.
Baıqaýdyń maqsaty - óskeleń urpaqtyń boıyna batyr babalarymyzdyń erlik dástúrlerin, rýhanı-parasattylyq, patrıottyq qundylyqtaryn qalyptastyrý, memlekettik tilimiz ben tól tarıhymyzdy qurmetteýge baýlý, oqýshylardyń kórkem sóıleý sheberligin arttyrýǵa yqpal etý jáne otansúıgishtikke tárbıeleý.
Saıysqa qatysýshylar «Alpamys batyr» jyrynan úzindilerdi jatqa aıtýmen qatar arnaıy sahnalyq kórinister kórsetti.
Qazylar alqasynyń sheshimimen úzdik nátıjege 4-5 jáne 6-7 synyp oqýshylary arasynda Qaztaı Abdýrrahman men Toqbolat Aqmanat qol jetkizse, ekinshi oryndy Takerova Nasıhat pen Ábisheva Mádına, al úshinshi oryndy Mándibekqyzy Móldir men Turdyev Mádı ıelendi. 9-10 synyp oqýshylary arasynda sahnalyq kóriniste birinshi orynǵa №67 gımnazııa mektebi jáne ekinshi orynǵa №2 Qosshy orta mektebi ıe boldy.
Baıqaý jeńimpazdary Qordyń arnaıy dıplomdary men syılyqtaryna ıe boldy.
