Memlekettik tildi bilý bárinen buryn memlekettik qyzmetshi úshin qısyndy talap - Májilis Tóraǵasy
ASTANA. Naýryzdyń 19-y. QazAqparat /Qanat Mámetqazyuly/ - Memlekettik tildi bilý bárinen buryn memlekettik qyzmetshi úshin qısyndy talap. Búgin QR Parlamenti Májilisinde ótip jatqan «Memlekettik til - el birliginiń kepili» atty ǵylymı konferentsııa barysynda sóz sóılegen Májilis Tóraǵasy Oral Muhamedjanov osylaı málim etti,
dep habarlaıdy QazAqparat.
«Til týraly Zańnyń 23-babynda: «Memlekettik tildi belgili bir kólemde jáne biliktilik talaptaryna sáıkes bilýi qajet kásipterdiń, mamandyqtardyń jáne laýazymdardyń tizbesi Qazaqstan Respýblıkasy zańdarymen belgilenedi» degen norma bar. Osy bir ǵana normany ómirge engizýdiń ózi memlekettik tildiń jaǵdaıyn kóp ilgeri jyljytar edi. Bastapqy kezde bul tizimge memlekettik tildi belgili bir kólemde bilýge tıisti kásipter men mamandyqtardyń bárin birdeı emes, memlekettik qyzmetshilerdi ǵana engizgen durys bolar edi. Óıtkeni, memlekettik tildi bilý bárinen buryn memlekettik qyzmetshi úshin qısyndy talap. Osy arqyly qalǵan kásipter men mamandyqtardy da birtindep Tizimge engizip otyrýǵa jol ashylar edi», dedi O. Muhamedjanov.
Sonymen birge, Májilis Tóraǵasy memlekettik tildiń qoldanylýyna qatysty normalardy anyqtaý ári jetildire túsý úshin Til týraly zańǵa ózgerister engizý qajettiligi týyndaıtynyn atap ótti. Onyń aıtýynsha, til saıasatyna qatysty zańnamany qazirgi talaptarǵa beıimdeýdiń mańyzy zor. «Zańnamaǵa memlekettik til máselesi boıynsha engiziletin normalarda qazaq tilinde jumys isteı alatyn basqa ult ókilderin yntalandyrý máselesin de kózdegen artyq bolmas edi. Bul - memlekettik tilge degen yqylasty oıatýdyń bir tetigi», dedi ol.
