«Memlekettik tildegi oqýlyqtar» atty úlken jobany qabyldaý kerek - EUÝ-dyń prorektory
ASTANA. Aqpannyń 10-y. QazAqparat /Arman Asqarov/ - Búgingi tańda «Memlekettik tildegi oqýlyqtar» atty úlken jobany qabyldaý qajet. Búgin Lev Gýmılev atyndaǵy Eýrazııa ulttyq ýnıversıtetinde ótken «Oqýlyq pen oqý quraldaryn ázirleý jáne jarııalaý: Eýrazııa ulttyq ýnıversıtetiniń tájirıbesi» taqyrybyndaǵy ǵylymı-ádistemelik konferentsııa barysynda osy joǵary oqý ornynyń Oqý-ádistemelik jumys jáne strategııalyq damý jónindegi prorektory Dıhan Qamzabekuly
osyndaı pikir bildirdi, dep habarlaıdy QazAqparat.
Onyń sózine qaraǵanda, Keńes odaǵy ydyrap, barlyq memleketter óz táýelsizdigin alǵannan keıin, til máselesi kóterildi. Bizde de bul úrdis ýaqytynda qolǵa alyndy. Biraq qazaq tilindegi oqýlyqtar máselesi umyt qaldy. Máselen, sol kezde-aq «Memlekettik tildegi oqýlyqtar» atty úlken jobany qabyldaý kerek edi. Qazir bolsa, memlekettik tildegi oqýlyqtardy taratýmen aınalysatyn ortalyqtar jumys istese de, olardyń halyqty qazaq tildi oqýlyqtarmen qamtý qyzmetinde áli de júıesizdik bar.
«Osy oraıda oqýlyqtardy jazý jumysyndaǵy keıbir máselelerge toqtalatyn bolsaq, búgingi tańda sheteldik jetekshi oqý oryndarynda ustazdardyń jyldyq júktemesi 500 saǵattan aspaıdy. Al bizde qyzmet etetin oqytýshynyń jyldyq júktemesi 850 saǵat. Bul óte kóp. Sonyń saldarynan shyǵarmashylyqtan tys qalǵan ýnıversıtet muǵalimderi oqýlyqtardy jaza almaı jatady. Endigi másele, ol - oqýlyq pen oqý quraldaryn jazatyn jas ǵalymdardy yntalandyrý jáne olardyń eńbekterin búgingi ómirge jaqyndastyrý», - deıdi D.Qamzabekuly.
