Memlekettik tildegi ınternet-resýrstardy damytýǵa kóp kóńil bólinse ıgi - M. Ábenov

Búgin QR Parlamenti Májilisiniń jalpy otyrysynda Úkimet basshysynyń atyna saýal joldaǵan depýtat Murat Ábenov osylaı málim etti.

«Búgingi zaman - aqparat pen ınternet zamany. Úkimet bul baǵytta az jumys atqarǵan joq. Alaıda, meni tolǵandyryp otyrǵan máseleniń biri - qazaq tilindegi ınternet-resýrstardyń jaıy. Sońǵy jyldary ana tilimizdegi veb-saıttardyń sany da, sapasy da artyp keledi. Qazaqtildi qoldanýshylardyń da sany ósýde. Alaıda ózderine qajetti aqparatty izdeýshiler kóptegen jaǵdaıda orys tilindegi veb-saıttardy aqtarýǵa, ondaǵy aqparattardy aýdarýǵa májbúr ekeni eshkimge de jumbaq emes», - dedi depýtat.

Onyń aıtýynsha, qazir búkil álemde ınternettiń damýyna barynsha jaǵdaı jasalǵan. Máselen, álem elderinde entsıklopedııalyq resýrstar men sózdikter vırtýaldy torǵa kóshirilýde. Al bul baǵytta qazaq tilinde atqarylyp jatqan sharalar kóńil kónshitpeıdi. «Máselen, búgingi kúni belgili bir ǵylym salasy nemese tarıhı derekti izdeý úshin ekiniń biri «Vıkıpedııa» saıtyna júginedi. Osy saladaǵy ozyq sanalatyn búkilálemdik «Vıkıpedııa» entsıklopedııasynda 278 tildegi 17 mln. 493 myń 205 maqala bar eken. Onyń 3,5 mln-nan astamy aǵylshyn tilinde. Orys tilindegi maqalalar sany 640 myń 191. Al qazaq tilindegi derekti maqala 7 myńǵa da jetpeıdi. Tipti túrki tildes memleketter ishinde ınternetti shektep ustaıtyn ózbekterden de qalyp turmyz. TMD elderi arasyndaǵy ornymyz da óte tómen», - dedi depýtat.

Budan bólek, depýtat qazaq tilinde kásibı, derekti, ámbebap, ǵylymı turǵydan minsiz, qamtylýy men turaqty tolyǵýy talapqa saı tolyqqandy veb-entsıklopedııa joq ekendigin alǵa tartty. «Bul jaǵdaı eldigimiz ben egemendigimizge syn emes pe? Nege qazaqtildi tutynýshylar ózge eldiń veb-resýrsyna táýeldi bolýy kerek?», - degen M. Ábenov, atalǵan máselelerge qatysty Úkimetke óz usynysyn joldady.