Memlekettik tilde sóılegen kezde depýtattar ózgelerge úlgi-ónege kórsetýi kerek - professor D. Turanqulqyzy
ALMATY. 15 qańtar. QazAqparat - Zań shyǵarýshy organda júrgen halyq qalaýlylary kópshilik aldynda júretindikten sóz sóıleýdiń tártibi men tehnologııasyn úırense eken.
Bul týraly búgin Almatyda Temirbek Júrgenov atyndaǵy ultyq óner akademııasynda Parlament depýtattarymen bolǵan kezdesý kezinde aıtyldy.
«Búgingi jıynda depýtattar tildi jańǵyrtý máselesin sóz etti. Qazaq tili memlekettik til bolǵandyqtan meniń oıymsha, halyq qalaýlylary eń aldymen ózderi sóz sóıleýdiń tártibi men tehnologııasyn meńgerýi tıis. Óıtkeni Parlamenttegi depýtattardyń arasynda memlekettik tilde sóılegen kezde sózdi durys aıtpaı, óz oıyn tolyq jetkize almaı, tusaýly attaı shoqyraqtaıtyndar da bar. Óner akademııasynda tildiń tehnologııasyn, sóıleý tártibin oqytatyn sahna tili degen arnaıy pán bar. Ondaǵy arnaıy mamandanǵan ustazdardy shaqyryp, 1-2 dáris alatyn bolsa mundaı keleńsizdikter bolmas edi», - deıdi QR Eńbek sińirgen qaıratkeri, óner akademııasynyń professory Darıǵa Turanqulqyzy. Sahna tili kafedrasy meńgerýshisiniń aıtýynsha, depýtattar memlekettik tildi meńgerýde jastarǵa úlgi kórsetýi kerek. Al tildi tolyq meńgermeı jatyp, ony jańǵyrtý asyǵystyq bolýy múmkin.
