«Memlekettik tilde ótken mańyzdy kezdesý» - respýblıkalyq basylymdarǵa sholý

«Qazaqstan Respýblıkasynyń Premer-Mınıstri Kárim Másimov Reseı Federatsııasy Úkimetiniń Tóraǵasy Vladımır Pýtınmen telefon arqyly sóılesti», dep jazady «Egemen Qazaqstan» gazeti QR Premer-Mınıstriniń baspasóz qyzmetine silteme jasap. Áńgime barysynda ekijaqty saýda-ekonomıkalyq yntymaqtastyqty odan ári damytýdyń birqatar máseleleri talqylanǵan.

El el Úkimet basshylarynyń suhbattasýy «Kazahstanskaıa pravda» gazetiniń de nazarynan tys qalmaǵan. Basylymnyń jazýynsha, áńgime kezinde Keden odaǵy jáne basqa da yqpaldastyq birlestikter aýqymynda ózara qarym-qatynastardy damytý keleshegi týraly pikir alysqan.

Keshe Memlekettik hatshy - Syrtqy ister mınıstri Qanat Saýdabaevtyń tóraǵalyǵymen Prezıdent janyndaǵy Sybaılas jemqorlyqqa qarsy kúres máseleleri jónindegi komıssııanyń osy jylǵy alǵashqy otyrysy ótti. Osyǵan oraı «Egemen Qazaqstan» gazetinde «Jemqorlyqpen kúres kún tártibinen túspeıdi» degen taqyryppen maqala jarııalandy. Basylymnyń jazýynsha, keńestiń kún tártibindegi máseleler boıynsha Ekonomıkalyq qylmysqa jáne sybaılas jemqorlyqqa qarsy kúres agenttiginiń tóraǵasy Q.Qojamjarov, Bas prokýror Q.Mámı, Ulttyq qaýipsizdik komıtetiniń tóraǵasy Á.Shaıahmetov, Memlekettik qyzmet isteri agenttiginiń tóraǵasy Q.Nurpeıisov sóz sóılegen.

Atalmysh komıssııanyń otyrysyna egjeı-tegjeıli toqtalǵan «Ekspress K» gazetiniń jazýynsha, alqaly jıynǵa qatysýshylar ótken jyldyń qorytyndysyn shyǵaryp, memlekettik organdardaǵy sybaılas jemqorlyq deńgeıi reıtıngisiniń nátıjesin qarastyrǵan.

«Egemen Qazaqstan» gazetiniń habarlaýynsha, Uly Jeńistiń 65 jyldyq merekesi qarsańynda Baýyrjan Momyshulynyń esimi Máskeýdegi №229 jalpy bilim beretin orta mektepke berilgen. «Bul qýanyshty habar elimizdiń Reseıdegi Tótenshe jáne Ókiletti Elshisi Zaýytbek Turysbekov pen Máskeý qalasy meriniń birinshi orynbasary Lıýdmıla Shvedtsovanyń Jeńistiń 65 jyldyq merekesin toılaý jónindegi kezdesýlerinde aıtyldy», dep jazady basylym.

***
«Parlament Senatynda joǵary palatanyń tóraǵasy Qasym-Jomart Toqaev bastaǵan depýtattar Túrik Respýblıkasynyń Syrtqy ister mınıstri Ahmet Dáýitoǵlymen kezdesti. Bastan-aıaq memlekettik tilde ótken bul kezdesýde eki el arasyndaǵy ózara tıimdi yntymaqtastyq, onyń ishinde parlamentaralyq baılanystardy odan ári tereńdetý jaıynda áńgime boldy», dep jazady «Aıqyn» gazeti búgingi sanynda jaryq kórgen «Memlekettik tilde ótken mańyzdy kezdesý» atty maqalasynda. Basylymnyń jazýynsha, mártebeli meıman Elbasy N.Nazarbaevtyń basshylyǵymen Qazaqstannyń qol jetkizgen tabystaryn joǵary baǵalaǵan.

Túrkııa Syrtqy ister mınıstriniń elimizdegi resmı sapary jaıynda «Lıter», «Izvestııa Kazahstan» basylymdary da egjeı-tegjeıli jazǵan.

«Aıqyn» gazetiniń dástúrli «Aq sóıle!» aıdarynyń búgingi qonaǵy - «Áziret Sultan» memlekettik tarıhı-mádenı qoryq murajaıynyń ǵylymı qyzmetkeri Saıpýlla Moldaqanaǵatuly. Ekeýara áńgime negizinen Ahmet Iassaýı kesenesindegi jazýlar tóńireginde órbigen. «Ahmet Iassaýı kesenesindegi tarıhı jazýlardy sáti kelse, túzetkenimiz durys» degen taqyryppen berilgen suhbattyń tolyq nusqasymen basylymnyń búgingi nómirinen oqı alasyzdar.

Elorda tórinde ótken 1-shi respýblıkalyq «Táýelsizdik tolǵaýy» konkýrsyna nazar aýdarǵan «Aıqyn» gazeti «Buryn-sońdy bolmaǵan baıqaý» degen taqyryppen kólemdi maqala jarııalady. Atalǵan baıqaýdyń jeńimpazdary, júlde qory jaıynda egjeı-tegjeıli bilgińiz kelse basylymda jaryq kórgen maqalaǵa nazar salyńyz.

Elimizde tuńǵysh ret ótkizilip otyrǵan atalmysh baıqaý «Alash aınasy» gazetiniń de nazarynan tys qalmaǵan.

Osy baıqaýǵa keńinen toqtalǵan «Astana aqshamy» gazeti Mádenıet jáne aqparat mınıstri Muhtar Qul-Muhammedtiń «Bul - el táýelsizdigine arnalǵan jańa shyǵarmalar baıqaýy. Tapsyryspen jazylǵan týyndy uzaqqa barmaıdy degen kózqaras bar. Menińshe, jańsaq pikir. Óıtkeni álemdik órkenıet kóshinde ózindik qoltańba retinde qalyptasqan shyǵarmalardyń úshten biri tapsyrys negizinde týyndaǵan eken. «Táýelsizdik tolǵaýynyń» mashtaby Qazaqstan aýmaǵynan asyp ketti. Oǵan AQSh, Kanada, Germanııada turatyn ónerpazdarymyz qatysty. Baıqaýdyń basty ereksheligi: jeńimpaz shyǵarmalar bıyldyń ózinde otandyq jetekshi teatr sahnalaryna jol tartady», degen sózin keltirgen.

***

«Alash aınasy» gazeti óziniń senbilik nómirinde bul kúnde Balqash aıdynynda joıylǵan alabuǵa balyǵyna nazar aýdarǵan. Basylym atalǵan kóldegi osy balyq túriniń kórinbegenine 30 jyldan asqanyn atap ótip, «Alabuǵa apaty 1960 jyldary kólge kókserke, aqmarqa tárizdi jyrtqyshtardy jibergen kezden bastalǵan. Dene turqy alabuǵadan anaǵurlym iri keletin kókserke balyqtyń úlken atalyq-analyqtaryn qýalap jese, aqmarqa qamys-qopa arasynda jaıylyp, ýyldyryǵyn joıyp otyrǵan», dep jazady. Maqala «Balqashtyń erkesi alabuǵa qaıda ketti?» degen taqyryppen jarııalanǵan.

«Aýǵandyqtardyń» rýhy óz eliniń qolpashyn kórgen jaǵdaıda ornyǵady». Osy taqyryppen «Alash aınasynda» jaryq kórgen suhbat aýǵan soǵysynyń ardageri, tarıh ǵylymynyń kandıdaty, dotsent Bolat Saılanmen arada órbigen. Suhbat barysynda «qazir ózimiz táýelsiz el atanǵan shaqta aýǵan ardagerlerin, onyń ishinde naǵyz erlik kórsetken jigitterdi marapattaýda aıanyp qalýǵa bolmaıdy dep oılaımyn. Ásirese múgedek bolyp qaıtqandardy erekshe nazarǵa alý kerek», deıdi aýǵan soǵysynyń ardageri.

«Keshe Kanadanyń Vankýver qalasynda HHІ qysqy Olımpıada oıyndarynyń alaýy tutandy», dep jazady «Astana aqshamy» gazeti. Tórt jylda bir ret tórtkúl dúnıedegi eń myqty sportshylar saıysqa túsetin básekede 86 altyn medal sarapqa túsetin bolady. Sporttyń 15 túri boıynsha Olımpıada chempıony ataǵy úshin 84 eldiń sańlaqtary jarys jolyna shyǵady. Atalǵan baıraqty básekege elimiz 39 sportshyny qosyp otyr.

Kanadada bastalǵan Olımpıada oıyndaryna qatysty materıaldar búgin jaryq kórgen barlyq merzimdi basylymdarda jaryq kórgen.

«Taılandtyń Bas prokýratýrasy jeltoqsan aıynda tutqyndalǵan Il-76 ushaǵy ekıpajyna qarsy aıyptaýlardan bas tartty», dep jazady «Vremıa» gazeti. Atalǵan oqıǵaǵa oraı materıal «Ekspress K» basylymynda da jarııalanǵan.