Memlekettik til tazalyǵyn saqtaýdyń naqty sharalary qoldanylýy shart - S. Tursynov
ASTANA. Aqpannyń 17-si. QazAqparat /Qanat Mámetqazyuly/ - Memlekettik til tazalyǵyn saqtaýdyń naqty sharalary qoldanylýy shart. Búgin QR Parlamenti Májilisiniń jalpy otyrysynda QR Mádenıet jáne aqparat mınıstrine saýal joldaǵan depýtat Saǵynbek Tursynov osylaı málim etti,
dep habarlaıdy QazAqparat.
«Búgingi kúni qazaq tilinde shyǵyp jatqan keıbir oqýlyqtardyń, gazet-jurnaldardyń tilin qarapaıym oqyrman turmaq, mamandardyń ózi túsinbeı qalatyndaı dárejege jetip otyrmyz. Buryn qazaq tilin resmı jáne ádebı til dep ekige bólip qarasaq, endigide aýdarma tili degen uǵym da paıda bolǵanǵa uqsaıdy. Qazaqstanda barshamyzǵa belgili barlyq ortalyq, aımaqtyq organdarda resmı qujattar orys tilinde ázirlenip, memlekettik tilge aýdarylady. Bundaǵy árbir organnyń aýdarmashylary sheteldik sózderdi óz betinshe tárjimalap, jónsiz termınderdi qoldanýdy shyǵardy. Tipti termınologııalyq komıssııa bekitpegen termınder de jıi kórinis berip, nátıjesinde baspa ónimderi saýatsyz aýdarmalar men túsiniksiz termınderge tolyp ketti.
Onyń aıtýynsha, bul rette memlekettik til tazalyǵyn saqtaýdyń naqty sharalary qoldanylýy shart. Osyǵan oraı, Memlekettik tildi damytý baǵdarlamasynyń bıyl aıaqtalatynyn aıtqan depýtat, aldaǵy jyldardy qamtıtyn baǵdarlama sheńberinde til tazalyǵy men termınderdi qoldaný tártibin retteıtin normalardy engizý qajettigin atap ótti. «Bul rette «Til týraly» zańǵa arnaıy ózgerister engizilgeni de jón», dedi ol.
