Memlekettik til saıasaty aıasynda onlaın kýrstar ótedi
NUR-SULTAN. QazAqparat - QR Mádenıet jáne sport mınıstrliginiń #ONLAIN-da bol jobasy aıasynda «Memlekettik tildi jetildirý» taqyrybynda onlaın kýrstar ótedi. «Til-Qazyna» ulttyq ǵylymı-praktıkalyq ortalyǵy» Memlekettik til saıasatyn iske asyrý baǵdarlamasyna sáıkes ótkizetin kýrs óńirlik tilderdi damytý basqarmalarynyń basshylaryna, tilderdi oqytý ortalyqtarynyń dırektorlaryna arnalǵan. Onlaın kýrstar 13-17 sáýir aralyǵynda ótedi. Bul týraly QazAqparat Ortalyqtyń baspasóz qyzmetine silteme jasap habarlaıdy.
Bes kúnge josparlanǵan onlaın kýrsta qazaq termınderin qalyptastyrý, saraptamadan ótkizý, qazirgi aqparattyq tehnologııalar múmkindikterin paıdalanyp termınder nusqalaryn talqylaýǵa qashyqtan qatysý máseleelri qarastyrylady. Sondaı-aq, qazaq tilin meńgergisi keletin eresek azamattardy oqytý úderisindegi jańalyqtar, til meńgerý deńgeılerin baǵalaýdyń QAZTEST júıesindegi ózgeristeri, qazaq álipbıin latyn grafıkasyna kóshirý úderisiniń ǵylymı negizdemeleri men ǵylymı-uıymdastyrýshylyq mindetterin iske asyrý joldary talqylanady. Budan bólek, qazaq tilin úırenýge yntaly azamattarǵa jasandy ıntellekt tehnologııasy arqyly jańa portaldy paıdalaný joldary, portal arqyly biregeı júıe qalyptastyrý tetigi, til úırenýdiń tıimdi tehnologııalary qaralady.
Kýrstar barysynda memlekettik baǵdarlamanyń mindetin óńirlerde iske asyrý boıynsha ózekti suraqtarǵa jaýap beriledi. Sonymen qatar, kúndelikti turmysta, áleýmettik salalarda qazaq tiliniń qoldanys aıasyn keńeıtý tetikterin jetildirý joldary tanystyrylady. Kýrs Facebook álemettik jelisiniń ONLINE-da bol paraqshasynda ár kún saıyn 11:00-12:00 aralyǵynda tikeleı efırde júrgiziledi.
