Memlekettik til - qazaq tili degen zań, til saıasatyndaǵy uzaq kúres ústinde paıda bolǵan - T.Jumaǵulova
ALMATY. Shildeniń 15-i. QazAqparat /Ádilet Musahaev/ - 1926-1989 jyldar aralyǵynda qazaqtyń ana tilin joǵaltý úderisine kóz salsaq, jyl saıyn 3792 qazaq óz ana tilimen qosh aıtysyp otyrǵan.
Bul jaıynda búgin Almaty qalasy ákimdiginiń «Til» oqý-ádistemelik ortalyǵynyń ádiskeri Tamara Jumaǵulova Qazaqstan-koreı jastarynyń qazaq tilin oqý forýmy barysynda málim etti.
T.Jumaǵulova memlekettik til - qazaq tili degen zań, til saıasatyndaǵy uzaq kúres ústinde paıda bolǵandyǵyn jáne ony zamananyń tól jemisi dep biletindigin aıtady.
«Memlekettik tildi oqytý, úıretý úlken eńbek, kóp izdenisti qajet etedi. Tilge degen qamqorlyqtyń nátıjesinde 1989 jyly respýblıkamyzda «Qazaq tili» qoǵamdary qurylyp, búginde Til komıteti, Tilderdi damytý basqarmalary jáne 63 oqytý ortalyqtary qyzmet etýde», deıdi til mamany.
Táýelsizdikke ıe bolǵan jyldar ishinde respýblıkada qazaq mektebiniń sany 880-ge jetse, mektep jasyndaǵy balalardyń 65 paıyzy qazaq mektepterinde oqıdy eken.
Sondaı-aq ol memlekettik organdarda jáne qoǵamnyń túrli salalarynda qyzmet etip jatqan ártúrli ulttyń ókilderi de memlekettik tildi úırenýge barynsha atsalysyp jatqandyǵyn tilge tıek etti. «Sondaı tilimizge janashyr ulttardyń biri - káris ulty. Tarıhı jaǵdaılarǵa baılanysty Qazaqstanǵa kelgen káris ultyn qazaq eli jatsynbady. Óziniń qonaqjaılylyǵymen, baýyrmaldyǵymen qazaq eli olardy ózine tarta bildi. Qazaq ulty men káris ultynyń arasynda uqsas qasıetter de kóp», deıdi «Til» oqý-ádistemelik ortalyǵynyń ádiskeri.
