Memlekettik telearnadan kórsetiletin, buqara sanasyna áser etetin kez kelgen kınotýyndy zııaly qaýymnan qurylǵan kórkemdik keńestiń súzgisinen ótýi tıis - B. Tileýhan
ASTANA. Qyrkúıektiń 22-si. QazAqparat /Qanat Mámetqazyuly/ - Memlekettik telearnalardan kórsetiletin, buqara sanasyna áser etetin kez kelgen kınotýyndy qandaı da bir BAQ jetekshileriniń sheshimimen emes, eldiń zııaly qaýymynan qurylǵan kórkemdik keńestiń súzgisinen ótip baryp, jaryq kórýi tıis.
Búgin Parlament Májilisiniń jalpy otyrysynda depýtat Bekbolat Tileýhan «Habar» arnasynan kórsetile bastaǵan «Janym» atty telehıkaıaǵa qatysty pikirin osylaı bildirip, Úkimet basshysyna saýal joldady.
Depýtat áýelgi sózi «Qazaq kınosy taǵy bir «shedevrmen» tolyqty» dep bastady. Bul «Habar» arasynan kórsetile bastaǵan «Janym» atty telehıkaıa. Sóz arasynda B. Tileýhan memlekettik arnadan qoıylyp júrgen kınonyń ataýynan bastap óne boıyn synnyń astyna aldy. «Sıýjetinde - syra ishken jalańbut qyz, zınaqor áke, bezbúırek bala, jasqanshaq ana, beıádep áıel, aqymaqtaý áje, «nıkýdyshnyı akademık», qaryndasymen kóńildes aǵa... Shynymen bizdiń Qazaqstan qoǵamy osyndaı ma? Eger múıizi qaraǵaıdaı «Habardyń» ózi osylaı berip jatsa, onda qoǵam týra sondaı dep oılaýǵa ábden negiz bar ǵoı?! Osyndaı áýlettiń azǵyndaǵan ómir saltyn bútkil elge tańý kimge kerek, nesi oryndy?!», dedi depýtat.
Onyń aıtýynsha, týyndynyń beıádep sıýjetteriniń ózi bir-birine qaıshy. Bunymen qosa, B. Tileýhan týyndyny «eshqandaı logıkaǵa kelmeıtin kıno emes qoıyrtpaq, eldi mazaqtaý, jurtty aqymaq qylý», dep baǵalady. Onyń sózine qaraǵanda, qazir qazaq kınosynda káristiń arzan fılmderinde beriletin patrıottyq sezim múldem joq.
«Ásirese, memlekettik telearnalardan kórsetiletin, buqara sanasyna áser etetin kez kelgen kınotýyndy qandaı da bir BAQ jetekshileriniń sheshimimen emes, eldiń zııaly qaýymynan qurylǵan kórkemdik keńestiń súzgisinen ótip baryp, jaryq kórýi tıis. Eń utymdy ýaqytqa qoıylatyn habarlarǵa da erekshe nazar aýdarý kerek. «Janymǵa» ketken aqsha arymnyń sadaǵasy - buny endigide kórsetpeı-aq qoısa qaıtedi. Jalpy, «Habar» memlekettik arna, oǵan bıýdjet qarjysy ketip otyr. Endeshe, bul aqylǵa syımaıtyn nárse. Sondyqtan, bul máselege Úkimet bir amalyn keltirse ıgi», dedi depýtat.
B. Tileýhan kótergen osy máseleni áriptesi Satybaldy Ibragıov ta qoshtady. Tipti, Ońtústik Qazaqstan oblysyndaǵy 30-ǵa tarta aqsaqaldar álgi «Habar» arnasyndaǵy «Janym» atty telehıkaıanyń kórsetilýine qarsylyq bildirip, depýtatqa hat joldapty.
«Biz búgingi kúni bıýdjetti qabyldaımyz. Al «Qazaqstan» men «Habar» arnalarynda kórsetiletin fılmder bıýdjet aqshasyna túsirilip, kórsetiledi. Telearnadan saltymyzdy, dástúrimizdi búldiretin, qoǵamǵa jat nárseni dáripteıtin ónimge jol berilmeýi tıis. Ondaı sapasyz ónimge ketken qarajatty soǵan qatysty azamattardan qaıtartyp alý máselesin de kún tártibine qoıýǵa bolady. Bul basqanyń emes bıýdjettiń, halyqtyń qarajaty», dedi S. Ibragımov.
