Memlekettik tapsyrys kontentteriniń 70% qazaq tilinde bolady – zań jobasy

ASTANA. QazAqparat – Endigi ýaqytta memlekettik tapsyrys aıasynda jarııalanatyn kontentterdiń 70 paıyzy tek qazaq tilinde bolady. Bul týraly Aqparat jáne qoǵamdyq damý vıtse-mınıstri Qanat Ysqaqov málim etti, dep habarlaıdy QazAqparat tilshisi.

«Memlekettik tapsyrys, grantqa qatysty biraz syn aıtylady. Jańa zań jobasynda memlekettik tapsyrys berýde ashyqtyqty keńeıte túsý kózdelgen. Memlekettik grant berilgen kezde, onyń naqty nátıjesi men merzimi kórsetiledi. Sonymen qatar BAQ berilgen granttardyń oqyrmandarǵa qandaı paıdasy bary eskeriledi. Sondaı-aq, zań aıasynda memlekettik tildiń rólin arttyra túsý de mindeti qarastyryldy. Endigi ýaqytta memlekettik tapsyrys aıasynda jasalatyn kontentterdiń 70%-y qazaq tilinde bolady», - dedi Qanat Ysqaqov «Mass-medıa» týraly zań jobasyn talqylaý barysynda Májilis depýtattarynyń saýalyna jaýap bere turyp.

Onyń aıtýynsha, búgingi memlekettik tapsyrysta belgilengen norma joq.

«Qazir memlekettik tildegi kontentter óte mańyzdy jáne tutynýshylar úshin qajet. Qazaq tilindegi kontentterdiń básekeligi joǵary», - deıdi ol.

Aıta keteıik, búgin Májiliste «Mass-medıa» týraly zań jobasy talqylandy. Onyń barysynda belgili bolǵandaı, otandyq BAQ salasynda baspasóz kartasy júıesi engizilmek.

Sondaı-aq, bıyl elimizde jýrnalısterdiń quqyǵy men bostandyǵy týraly ulttyq baıandama ázirlenedi.

Jıyn barysynda BAQ jáne tilshilerdi sotqa berý merzimi 3 jylǵa deıin qysqartylatyny aıtyldy.

Odan bólek, Májilis depýtaty BAQ ókilderine mártebe berip, turǵyn máselesin sheshý týraly oıyn ortaǵa saldy.