Memlekettik syılyqtyń ıegeri, jazýshy Ánes Saraı 75 jasqa toldy
ASTANA. 20 qarasha. QazAqparat - Astanada 2012 jyldyń 23 qarashasynda
Memlekettik syılyqtyń ıegeri, Qazaqstannyń eńbek sińirgen qaıratkeri, belgili jazýshy, dramatýrg Ánes Saraıdyń 75 jyldyǵyna arnalǵan shyǵarmashylyq kesh ótedi. Bul týraly Astana qalasy ákimdiginiń resmı saıtynda habarlandy.
Keshke jazýshynyń qalamger áriptesteri, el aǵalary jáne onyń týyndylaryn súıip oqıtyn kópshilik qaýym qatysady dep kútilýde.
«75 degen ájeptáýir jas. Bul kýáliktegi jas. Adamda taǵy bıologııalyq jas degen bolady. Meniń bıologııalyq jasymnyń qandaı ekenin bilmeımin, biraq jumystan qalyp, qajyr-qaıratym taıyp, jumys isteı almaı qalǵan kúnim bolǵan joq. Shúkir, áli jumys istep jatyrmyn», - deıdi qalamger.
Jazýshy taǵdyr tálkegimen qazaq topyraǵynan jyraqta qalsa da, terbelip ósken tal besigi Atyraý óńiri. Teńiz jaǵasynda qanat qataıtqandyqtan ba, 1963 jyly jaryq kórgen «Daýylda» atty tyrnaq aldy áńgimesinen bastap «Edil-Jaıyq» trılogııasyna deıingi barlyq shyǵarmalary teńiz taqyrybyna arnalyp keldi. Tipti, jazýshy qazaq ádebıetinde «teńiz jyrshysy» atanyp ta ketti.
Al, búginde qazaq tarıhynyń aqtańdaq tustaryn zerttep, tarıhı jádigerlerdi quzar shyńǵa shyǵaryp keledi. Atap aıtatyn bolsaq, osy kúnge deıin «Atyraý» dılogııasy, «Edil-Jaıyq» romany, «Muhammed paıǵambardyń ómiri» atty tarıhı aýdarma eńbegi, «Isataı men Mahambet» atty zertteý eńbekteri jaryq kórip, onnan astam pesalary Astana, Almaty, Qyzylorda, Qaraǵandy teatry sahnalarynda qoıylyp júr. Qazir qalamger «Qalmaq qyrǵyny» atty tarıhı zertteý eńbegin jazý ústinde.
