Memlekettik syılyqqa usynylǵan jumystar tizimi bekitildi
TANA. 24 qazan. QazAqparat /Marlan Jıembaı/ - Búgin Aqordada QR Memlekettik hatshysy Qanat Saýdabaevtyń tóraǵalyǵymen Ǵylym men tehnıka salasyndaǵy Qazaqstan Respýblıkasynyń Memlekettik syılyǵyn berý jónindegi respýblıkalyq komıssııanyń qorytyndy otyrysy ótti.
Alqaly jıyndy ashqan Q.Saýdabaev óz sózinde Memlekettik syılyq Elbasynyń Jarlyǵymen beriletin bolǵandyqtan, komıssııa aldynda óte jaýapty mindet - usynylǵan jumystardyń ishinen Memleket basshysynyń talaptaryna sáıkes keletin laıyqty eńbekterdi irikteý jaýapkershiligi turǵandyǵyn basa aıtty. Bul krıterıılerdiń aıqyn jáne naqty ekendigi belgili. Syılyqqa usynylǵan árbir jumys eń aldymen, otandyq ǵylymda serpindi, óz salasynda álemdik ǵylymı jumystarmen básekeles bolýy, ǵylymı-tehnıkalyq progreske eleýli úles qosýy tıis.
Otyrys qorytyndysy boıynsha komıssııa Ǵylym men tehnıka salasyndaǵy 2011 jylǵy Qazaqstan Respýblıkasynyń Memlekettik syılyǵyn berý úshin Elbasyna usynylatyn jumystardyń tizimin bekitti.
Aıta keteıik, ǵylym men tehnıka salasyndaǵy QR Memlekettik syılyǵyn berý ǵylym, tehnıka qaıratkerleriniń eńbegin qoǵam men memleket aldynda joǵary baǵalaý bolyp tabylady. Ol Qazaqstan azamatyna beriledi jáne ony QR Prezıdenti otandyq ǵylymdy damytýǵa qosqan eleýli úlesi úshin 2 jylda bir ret Táýelsizdik kúni tapsyrady.
