Memlekettik syılyq laýreattaryn marapattaý rásimi Respýblıka kúni qarsańynda ótedi

ASTANA. QazAqparat - Abaı atyndaǵy ádebıet pen óner salasyndaǵy memlekettik syılyǵyn berý jónindegi komıssııanyń qorytyndy otyrysy ótti, dep habarlaıdy QazAqparat Aqordanyń resmı saıtyna silteme jasap.

Qazaqstan Respýblıkasynyń Memlekettik keńesshisi Erlan Qarınniń tóraǵalyǵymen 2022 jylǵy Qazaqstan Respýblıkasynyń Abaı atyndaǵy ádebıet pen óner salasyndaǵy memlekettik syılyǵyn berý jónindegi komıssııanyń qorytyndy otyrysy ótti.

Komıssııa músheleri ádebıet, kıno, teatr, mýzyka, sáýlet jáne beıneleý óneri baǵyttary boıynsha Memlekettik syılyqtyń ekinshi kezeńine ótken 10 jumysty qarady.

Konkýrstyń ekinshi kezeńine ótken shyǵarmalar qoǵamda keńinen talqylandy. Mádenıet jáne sport mınıstri Dáýren Abaev Komıssııa múshelerine talqylaý qorytyndysyn baıandady.

Komıssııa jasyryn daýys berý arqyly Memleket basshysynyń qaraýyna usynylatyn 2022 jylǵy Qazaqstan Respýblıkasynyń Abaı atyndaǵy ádebıet pen óner salasyndaǵy memlekettik syılyǵy laýreattyǵyna úmitkerlerdi anyqtady.

Bıyl Memlekettik syılyq laýreattaryn marapattaý Respýblıka kúni qarsańynda ótedi.