Memlekettik syılyq qarajatyn qaıyrymdylyqqa beremiz – Kúnsulý Zakarııa

NUR-SULTAN. QazAqparat – QazVac vaktsınasyn ázirleýshi jáne Bıologııalyq qaýipsizdik problemalary ǵylymı-zertteý ınstıtýtynyń bas dırektory Kúnsulý Zakarııa ál-Farabı atyndaǵy ǵylym men tehnıka salasyndaǵy memlekettik syılyqtan keıin QazAqparat HAA tilshisine suhbat berip, qazaqstandyqtarǵa otandyq ǵylymdy qoldaǵany úshin alǵys aıtty.

«Osyndaı mártebeli ataq úshin joǵary jaýapkershilik sezimi de boıdy kernep tur. Bıologııalyq qaýipsizdik problemalary ǵylymı-zertteý ınstıtýtynyń 63 jyldyq tarıhy bar. Osy aralyqta ınstıtýt ǵalymdary qaýipti jáne asa qaýipti ınfektsııalarǵa qarsy 70-ke jýyq vaktsına ázirledi. Bul – búkil ujymnyń eńbegi. Al búgin barlyq jyldardaǵy sol qajyrly eńbekti baǵalap otyr. Bul vaktsınalardyń barlyǵy óz ýaqytynda bıologııalyq qaýipsizdikti qamtamasyz etý úshin úlken ekonomıkalyq mańyzǵa ıe boldy. Biz sońǵy eki jylda orasan zor jumys júrgizdik: alǵashqy qazaqstandyq QazVac vaktsınasyn ázirledik, synaqtan ótkizdik, medıtsınalyq qoldanýǵa engizdik jáne bıylǵy sáýir aıynan bastap shyǵardyq», - deıdi K. Zakarııa.

Onyń aıtýynsha, Prezıdent Qasym-Jomart Toqaev ǵalymdardyń jumysyna árdaıym qoldaý kórsetip, ázirlemelerge erekshe qyzyǵýshylyq tanytyp otyrǵan.

«Memlekettik marapatty Memleket basshysy Qasym-Jomart Toqaevtyń qolynan alǵanymdy erekshe maqtanysh tutamyn. Prezıdent bastapqyda-aq bizdiń jumysymyzdy qoldady, jańa ázirlemelerge jan-jaqty qyzyǵýshylyq tanytty. Úkimet te kómek kórsetti. Kóptegen mınıstrlikter men vedomstvolar jáne is júzinde barlyq BAQ halyqty bizdiń zertteýimiz ben ázirlemelerimizdiń barysy týraly habardar etti, sol úshin olarǵa jeke rahmetimdi aıtamyn», - dedi K. Zakarııa.

Sonymen birge, otandyq vaktsınany ázirleýshi «QazAqparat» agenttiginiń ujymyna aqparattyq qoldaý kórsetkeni úshin alǵys aıtty.

«QazAqparat» agenttigine jeke alǵysymdy bildirgim keledi, vaktsınany ázirleýdiń alǵashqy kúnderinen bastap, sizder aqparattyq salada qoldaý kórsettińizder. Halyqty aqparattandyrý boıynsha barlyq jumystardy júrgizip, vaktsınalaýdyń mańyzdylyǵyn túsindirdińizder, bul halyq arasynda osy kúrdeli aýrýdyń aldyn alý men joıý úshin óte qajet. Kóp raqmet. Barshańyzdy uly merekemiz – Táýelsizdik kúnimen quttyqtaımyn. Bul bizdiń ata-babalarymyz armandap ótken Táýelsizdik», - dedi Kúnsulý Zakarııa.

Sóz sońynda ǵalym QazVac otandyq vaktsınasyn alǵashqylardyń biri bolyp synap kórgen eriktilerdiń úlesin erekshe atap ótti.

«Bıik azamattyq ustanymyn kórsetip, alǵashqy qazaqstandyq vaktsınanyń klınıkalyq zertteýlerine qatysqan 3 244 eriktige jeke alǵysymdy bildirgim keledi. Olar óz densaýlyǵyn táýekelge tikti. Qazir ekinshi vaktsınamyzdy synaqtan ótkizip jatyrmyz, oǵan Taraz qalasy men Jambyl oblysynan 300-ge jýyq adam qatysýda. Bul shyn máninde búgingi kúnniń erligi.

Biz ǵylym men tehnıka salasyndaǵy stıpendıattar atynan bul syılyqtyń birde-bir teńgesin almaýdy uıǵardyq. Biz bul somany Jambyl oblysynyń muqtaj turǵyndaryna páter alýǵa beremiz. Qaıyrymdylyq retinde biz muqtaj adamdarǵa, baspanasyz adamdarǵa kómekteskimiz keledi. Óıtkeni otbasy úshin eń bastysy – óz úıi», - deıdi Kúnsulý Zakarııa.