Memlekettik sýbsıdııa arqyly qustardy saqtandyrý júıesi naryqqa shyǵady – QR AShM
Búgingi kúni mal sharýashylyǵy salasyndaǵy saqtandyrý syıaqylarynyń bir bóligin sýbsıdııalaý maqsatynda 6 ónim bekitildi. Endi bul tizimge qustardy saqtandyrý ónimi qosyldy, dep habarlaıdy QazAqparat Qr aýyl sharýashylyǵy mınıstrliginiń Telegram kanalyna silteme jasap.
Operator retinde «Aýyl sharýashylyǵyn qarjylaı qoldaý qory» AQ bolyp bekitildi.
Óndiris shyǵyndaryn óteýde, paıda tabýda jáne túrli jaǵdaılarǵa baılanysty shyǵynǵa batyp qalmas úshin qus ósirýshiler qustaryn saqtandyrǵandary óte mańyzdy. Bul saqtandyrý ónimi ózekti jáne qazirgi ýaqytta suranysqa ıe.
Jańa saqtandyrý ónimi de iri qara mal, usaq mal jáne jylqy sııaqty saqtandyrylady jáne barlyq yqtımal táýekelderdiń shyǵyny óteledi. Salystyrmaly túrde aıtqanda saqtandyrýdyń quny da tómen bolady.
Túrli aýrýlardan, órtten, jazataıym oqıǵalardan, tabıǵı apattardan ólgen jaǵdaıda jáne urlansa, joǵalyp ketse saqtandyrý sharttaryna sáıkes ornyn toltyrýǵa múmkindik bar.
Saqtandyrý úshin kem degende 30 bas qus bolý kerek. Qustardyń sanyna baılanysty -2,31%-dan 2,77%-ǵa deıingi túrli deńgeıdegi tarıfter belgilendi. Bul ónimdi operator bekitkendikten saqtandyrý syıaqylaryn memleket sýbsıdııalaıdy. Ol fermerlerdi yntalandyrýǵa jáne saqtandyrý syıaqysy somasynyń 50%-yn sýbsıdııalaý arqyly saqtandyrý shartynyń jarty qunyn arzandatýǵa baǵyttalǵan.
Júıede Qazaqstan Respýblıkasynyń qarjy naryǵyn retteý jáne damytý jónindegi agenttiginiń lıtsenzııasy bar saqtandyrý kompanııalary ǵana jumys isteıdi. Saqtandyrý ónimi sheńberindegi táýekelder álemdik saqtandyrý naryǵynda «A» reıtıngisi bar Halyqaralyq qaıta saqtandyrý kompanııalary qaıta saqtandyrady. Bul saqtandyrý jaǵdaılary týyndaǵanda kepildendirilgen tólemderdi qamtamasyz etýge múmkindik beredi.
«Shart jasasýdan bastap tólemderge deıingi barlyq rásimder aýyl sharýashylyǵy taýaryn óndirýshiniń elektrondyq tsıfrlyq qoltańbasy negizinde Qoldau.kz platformasynda ornalasqan Agroinsurance aqparattyq servısinde atqarylady»,-delingen habarlamada.