Memlekettik sımvoldar týraly sóz qozǵalǵanda boıymdy erekshe sezimder bıleıdi - Eltańba avtory

ASTANA. QazAqparat - «Qazaqstan Respýblıkasynyń Memlekettik sımvoldary. 25 jyl: tarıh pen qoldaný tájirıbesi» atty ǵylymı-praktıkalyq konferentsııada Eltańba avtory Jandarbek Málibekov QR Memlekettik sımvoldar kúni qarsańynda barsha qazaqstandyqtardy quttyqtady, dep habarlaıdy QazAqparat.

«Aldaǵy mereke biz úshin mańyzdy ári qymbat. Biz Memlekettik sımvoldarymyzdy syılaýymyz, qurmetteýimiz kerek. Barsha qazaqstandyqtardy QR Memlekettik sımvoldary kúnimen quttyqtaımyn!», - dedi Jandarbek Málibekov.

Ol sonymen qatar, sońǵy 25 jylda QR Prezıdenti Nursultan Nazarbaevtyń basshylyǵymen elimizdiń damýyna, ekonomıkanyń qarqyn alýyna qatysty qyrýar jumys atqarylǵanyn atap ótti.

«Qazir búkil memleketterde bizdiń Tý men Eltańbany tanıdy, biledi. Bizdiń balalarymyz ben jastarymyz túrli salalarda ózderiniń úlken jetistikteri arqyly halyqaralyq arenalarda Qazaqstannyń atyn shyǵaryp júr. Memlekettik sımvoldar týraly sóz qozǵalǵanda boıymdy erekshe sezimder bıleıdi. QR Memlekettik Eltańbasynyń avtory bolǵannan soń, men ony basqa qalaı qabyldaı alamyn?!», - dep jalǵastyrdy Málibekov.

Sóz sońynda qazaqstandyq Eltańbanyń avtory el azamattaryna respýblıkanyń memlekettik sımvoldaryna qurmetpen qaraýǵa úndedi.