Memlekettik shekarany buzýshylardy jaýapqa tartý
ASTANA. 31 qazan. QazAqparat - Tasada ańdyp otyratyn uzaq ýaqyt, odan keıingi shekara buzýshynyń izin qýalap, ony qolǵa túsirý... Osymen shekarashynyń barlyq mindeti pen tapsyrmasy aıaqtalǵandaı bolyp kórinetindigi sózsiz. Degenmen, osydan keıin shekara buzýshynyń kinásin dáleldep, jaýapkershilikke tartý boıynsha tergeýshilerdiń kún-tún qatqan eńbegi bastalatyndyǵyn bireý bilse, bireý bilmeıdi. Shekara buzýshy jaýapkershilikke tartyla ma, álde ádil jazadan qutylyp kete me - munyń barlyǵy tergeýshilerdiń saýatty da uqypty is-qımylyna tikeleı baılanysty bolyp keledi.
Memlekettik shekara buzýshylyqty (shekara keńistiginde) úsh negizgi topqa bólýge bolady. Birinshisi, is-qımyldy uıymdastyrý, ekinshisi, shekara qyzmeti jáne úshinshisi - árbir quqyqbuzýshylyq boıynsha protsessýaldy sheshim qabyldaý.
Ótken merzim ishinde Shekara qyzmetiniń arnaýly quramalary men bólimderiniń tergeý organdary shekara keńistiginde jasalǵan ártúrli ister boıynsha 210 qylmystyq is qozǵady. Olardyń 96-sy memlekettik shekarany qasaqana buzý deregi boıynsha, 59-y zańsyz esirtki aınalymy boıynsha, 27-i ádeıi jalǵan qujattardy qoldaný deregi boıynsha, al qalǵandary zańsyz qarý saqtaý, ekonomıkalyq kontrabanda, zańsyz kóshi-qon uıymdastyrý, laýazymdy tulǵaǵa para berý derekteri boıynsha qozǵalǵan.
Munyń ishinde, Shekara qyzmeti tergeý organdary qozǵaǵan qylmystyq isterdiń 50-niń tergeý jumystary aıaqtalyp, sot oryndaryna jetkizildi, nátıjesinde olar boıynsha 39 aıyptaý úkimderi shyǵaryldy, qazir sottardyń qaraýynda 11 qylmystyq is jatyr.
39 protsessýaldy sheshimder boıynsha kináli adamdar qylmystyq jazaǵa tartyldy. Olardyń 7-ne jalpy somasy 2,5 mln. teńge kóleminde aıyppul salyndy.
Atap aıtarlyǵy, 210 qylmystyq istiń 22-si asa aýyr qylmystar boıynsha, 23-i aýyr qylmystar boıynsha qozǵalǵan.
Tergeýshilerdiń quqyqtyq bazasy da jetildirilý ústinde. Tergeýshiler «Qylmystyq zańdylyqty jetildirý boıynsha Qazaqstan Respýblıkasynyń keıbir zańdylyq aktilerine ózgerister men tolyqtyrýlar engizý týraly» Zań jobasyn daıyndaýǵa tikeleı qatysty.
Qazirgi ýaqytta tergeý bólimsheleri qylmysty jan-jaqty jáne obektıvti tergeýge jumyldyrylyp otyr, ıaǵnı, sotqa deıingi sapaly tergeý jumysy júrgiziler bolsa, qylmystyq isterdiń prokýrorlar men sot tarapynan qaıta tergeýge kelýi de azaıatyndyǵy sózsiz. Bul týraly QR UQK ShQ baspasóz qyzmetinen habarlady.
