Memlekettik shekarany buzǵandarǵa jaýapkershilik kúsheıtiledi

ASTANA. QazAqparat – Elimizdiń memlekettik shekarasyn buzǵandarǵa jaýapkershilik kúsheıtilmek. Bul jaıynda Senat depýtattarynyń saýalyna QR Premer-Mınıstri Álıhan Smaıylovtyń jaýabynda aıtylǵan, dep habarlaıdy QazAqparat tilshisi.

«Memlekettik shekara rejımi men shekara rejımin buzýǵa qarsy turý maqsatynda Ulttyq qaýipsizdik komıtetiniń Shekara qyzmeti keshendi aldyn alý is-sharalaryn júrgizedi. Shekaralas aımaqtyń jergilikti turǵyndarymen únemi jıyndar men túsindirý jumystary júrgizilip turady», - dedi Úkimet basshysy jaýabynda.

Onyń atap ótýinshe, buqaralyq aqparat quraldarynda jáne ınternet-resýrstarda shekaralyq aýmaqta zańnamany buzǵany úshin jaýapkershilik týraly aqparat jarııalanap otyrady.

«Qylmystyq zańnamany ońtaılandyrý aıasynda UQK memlekettik shekarany buzǵany úshin jaýapkershilikti kúsheıtý máselesin qarastyrýda. Odan bólek, shekara qaýipsizdigin qamtamasyz etý boıynsha keshendi is-sharalardy ázirleý jáne júzege asyrý maqsatynda Úkimet janynda Memlekettik shekara komıssııasy, sondaı-aq oblys jáne aýdan ákimdikteri janynda shekara máseleleri boıynsha úılestirý keńesteri jumys isteıdi», - dedi Álıhan Smaıylov.