Memlekettik saıasatty durys júzege asyrý «A» korpýsyna tikeleı baılanysty bolady - N. Nazarbaev
ASTANA. 17 qazan. QazAqparat - Memlekettik saıasatty muqııat júzege asyrý «A» korpýsyna tikeleı baılanysty bolady. Búgin Astanadaǵy «Qazmedıa» ortalyǵynda «A» basqarýshy korpýsy memlekettik qyzmetshilerimen keńes ótkizgen Elbasy Nursultan Nazarbaev osylaı málim etti.
Sóz arasynda Elbasy memlekettik «A» basqarýshy korpýsyna irikteý barynsha básekeli bolǵanyn atap ótti. Nátıjesinde «A» korpýsyna jatatyn laýazymnyń 30 paıyzy jańarǵan. «Bizge kásibı turǵydan ábden shyńdalǵan, óz babymen ysylǵan bilikti mamandar ár ýaqytta qajet. «A» korpýsyna ótý sizderge úlken abyroımen qatar zor jaýapkershilikti júkteıdi. Sheshim qabyldaıtyn basshylyq quramy men ony oryndaıtyndar arasyndaǵy jalǵastyrýshy býyn sizder bolasyzdar. Elimizde 100 myńǵa jýyq ákimshilik memlekettik qyzmetkerler tikeleı sizderge baǵyna jumys isteıtin bolady. Bul óte zor áleýet. Qazaqta «qara sýda qaımaq joq, qas sheberde oımaq joq» degen sóz bar. Óte keremet aıtylǵan. Sheberdiń ózi kásibılikti bildiredi. Ár adam qaı salada júrse de óz qyzmetin jetildirip, kásibıligin shyńdap, oqyp-toqyp júrýi kerek», - dedi Elbasy. Sonymen qatar, Memleket basshysy Qazaqstannyń jas, jańa qurylǵan memleket ekenin, kóp joldyń saradan salynǵanyn atap ótti. Biraq ta, Elbasynyń aıtýynsha, álemde memlekettik basqarý júıesi burynnan qalyptasqan. «Budan bulaı memlekettik saıasatty durys, muqııat júzege asyrý sizderge baılanysty bolady», - dedi N. Nazarbaev.
