Memlekettik sáýlet-qurylys baqylaý departamentiniń veb-saıty iske qosyldy
Vedomstvonyń atap ótýinshe, ótken jyldyń tamyzynda Memleket basshysy memlekettik sáýlet-qurylys baqylaý jáne lıtsenzııalaý máseleleri boıynsha jergilikti atqarýshy organdardyń fýnktsııalary men ókilettilikterin Qurylys jáne turǵyn úı-kommýnaldyq sharýashylyq isteri agenttigine berý kózdelgen Jarlyqqa qol qoıǵan. Osyǵan oraı, qurylystyń qaýipsizdigi men sapasyna biryńǵaı memlekettik baqylaýdy júzege asyrý úshin elimizdiń barlyq oblystarynda memlekettik mekemelerdiń uıymdastyrý-quqyqtyq nysanda agenttiktiń janynan memlekettik sáýlet-qurylys baqylaý aýmaqtyq bólimsheleri quryldy. Atalǵan departamentter qyzmetiniń máni vedomstvoǵa baǵynyshty aýmaqta sáýlet-qurylys baqylaýyn, lıtsenzııalaýdy jáne attestattaýdy júzege asyrý bolyp tabylady.
Agenttiktiń Memlekettik sáýlet-qurylys baqylaý aýmaqtyq departamentteri jumysynyń ashyqtyǵyn, eseptiligin jáne jumysynyń tıimdiligin arttyrý maqsatynda arnaıy veb-saıtyn ashý týraly sheshim qabyldandy. www.gask.ads.gov.kz veb-saıty qazaq jáne orys tilderinde jumys isteıdi. Barlyq paıdalanýshylar QR Qurylys jáne turǵyn úı-kommýnaldyq sharýashylyq isteri agenttigi Memlekettik sáýlet-qurylys baqylaý, qadaǵalaý, lıtsenzııalaý jáne attestattaý departamentiniń dırektory Ǵalymjan Ábraıymovtyń blogyna ózderiniń usynystaryn, eskertýlerin jáne suraqtaryn qaldyra alady.
«Búgingi tańda Qazaqstanda qurylys jumystaryn oryndaý lıtsenzııasyn alý talaptary qurylys kompanııalary úshin kúsheıtilgenin eske salamyz. Elimizdiń «Qazaqstan Respýblıkasyndaǵy sáýlet, qala qurylysy jáne qurylys qyzmeti týraly» jáne «Lıtsenzııalaý týraly» Zańdaryna tıisti ózgerister aǵymdaǵy jyldyń 30 qańtarynda kúshine endi. QR-daǵy qurylystyń sapasyn arttyrý jóninde Úkimet qabyldap jatqan jańa sharalar týraly tolyq aqparatty ınternet-paıdalanýshylar memlekettik sáýlet-qurylys baqylaý departamentteriniń veb-saıtynyń «Quqyqtyq baza», «Resmı ótinishter» jáne basqa aıdarlarynyń jańalyqtary men materıaldarynan bilýine bolady», - delingen vedomstvo aqparatynda.
