Memlekettik sáýlet-qurylys baqylaý basqarmasy Almaty turǵyndaryna arnap ashyq esik kúnin ótkizdi
ALMATY. Mamyrdyń 18-i. QazAqparat /Ádilet Musahaev/ - Búgin Almaty qalasy memlekettik sáýlet-qurylys baqylaý basqarmasy qala turǵyndary arasynda aqparattyq-túsindirý jumystaryn kúsheıtýmen basqarma qyzmetine qatysty barlyq suraqtarǵa jaýap berý maqsatynda ashyq esik kúnin ótkizdi,
dep habarlaıdy QazAqparat.
Atalmysh basqarma bastyǵy Asqar Tutýbaevtyń aıtýynsha, basqarma jetekshilik etip otyrǵan qurylys-montaj jumystarynyń sapasy qala jaǵdaıynda erekshe mańyzǵa ıe, ári árdaıym almatylyqtardyń qyzyǵýshylyǵyn týdyrýda.
«2009 jyly bizdiń basqarmaǵa halyqtan ár túrli suraqtar boıynsha 36 myńnan astam úndeýhat joldanǵan. Al aǵymdaǵy jyldyń alǵashqy 5 aıynda 16 myńǵa jýyq osyndaı hat keldi. Biz olardyń barlyǵyn qarap, der ýaqytynda jaýap berip otyrdyq. Tipten 900-ge jýyq adamdy ózim qabyldap, kókeılerinde júrgen suraqtaryna jaýap berdim. Kóbinde adamdar «Jol kartasy» broıynsha júrgizilip jatqan qurylys boıynsha ózderin mazalap júrgen saýaldaryn qoıyp jatady», deıdi A.Tutýbaev.
Sondaı-aq ol jurtshylyqtyń úndeýine tikeleı jaýap berý maqsatynda arnaıy saıttyń ashylǵandyǵyn jetkizdi.
Jıynǵa kelgen qurylys kompanııalary, páter ıeleriniń kooperatıvteri, qalanyń ǵylymı jobalaý uıymdary jáne buqaralyq aqparat quraldary ókilderi qalada jumysy toqtap turǵan qurylystar men kommýnaldyq júıege qatysty jáne ózderin mazalap júrgen suraqtaryna jaýap aldy.
