Memlekettik satyp alýlardy biryńǵaı organ retteıdi - mınıstr B.Jámishev
ASTANA. 28 qazan. QazAqparat - Aldaǵy ýaqytta memlekettik satyp alýlardyń biryńǵaı uıymdastyrýshysy qurylady. Bul týraly búgin QR Prezıdenti janyndaǵy Ortalyq kommýnıkatsııalar qyzmetiniń baspasóz máslıhatyna qatysqan QR Qarjy mınıstri Bolat Jámishev málim etti.
Onyń sózine qaraǵanda, atalǵan mindetti mınıstrlik quramyndaǵy komıtetterdiń bireýi atqarýy múmkin. «Negizgi maqsat - memlekettik satyp alýlar salasyndaǵy tártip buzýshylyqty boldyrmaý. Biryńǵaı uıymdastyrýshy memlekettik satyp alýlardy arnaıy konkýrstar men aýktsıondar arqyly ótkizetin bolady», - dedi B.Jámishev. Mınıstr atap kórsetkendeı, konkýrstyq komıssııalardy mınıstrler basqarsa, jergilikti jerde ákimder jetekshilik etedi.
