Memlekettik satyp alýlarda qandaı ózgerister bolady
ASTANA. QazAqparat - QR Qarjy mınıstri Álıhan Smaıylov memlekettik satyp alýlar salasyndaǵy problemalardy atady, dep habarlaıdy QazAqparat.
«Memlekettik satyp alý salasynda úsh negizgi problema bar. Birinshiden, satyp alý rásimderiniń shamadan tys rettelgeni. Ekinshiden, satyp alýǵa qatysýshylardyń biliktiliginiń tómendigi. Úshinshiden, bir kózden satyp alý úlesiniń tym kóptigi», - dep toqtaldy mınıstr.
Onyń sózine qaraǵanda, bir kózden satyp alýdyń shekti somasy 100-den 500 AEK-ke deıin ulǵaıady. «Bul mańyzdylyǵy az satyp alý rásimderin jeńildetýge, otandyq ónim berýshilerdi qoldaýǵa múmkindik beredi», - dedi Á. Smaıylov.
Sonymen qatar, vedomstvo basshysy bıýdjettiń tórtinshi deńgeıin engizý aıasynda aýyl ákimdikteri úshin bir kózden satyp alýdyń shekti somasy úsh myń AEK-ke deıin ósetinin jetkizdi. Budan bólek, tapsyrys berýshilerge baǵa usynystarymen satyp alý kezinde taýarlardyń fırmalyq ataýlaryn kórsetýge quqyq beriledi. Bul óz kezeginde sapaly taýarlardy satyp alýǵa yqpal etedi.
«Atap óterligi, «elektrondyq qalta» uǵymy engiziledi. Bul áleýetti ónim berýshiniń shotyna konkýrstyq ótinishti qamtamasyz etetin aqshany avtomatty túrde qaıtarýǵa múmkindik beredi. Osylaısha, satyp alýǵa qatysatyndarǵa bank shyǵyndary boıynsha túsetin júkteme azaıady», - dedi Álıhan Smaıylov.
Budan buryn habarlanǵandaı, Májilistiń jalpy otyrysynda «Qazaqstan Respýblıkasynyń keıbir zańnamalyq aktilerine memlekettik satyp alý jáne kvazımemlekettik sektor sýbektileriniń satyp alý máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldandy.
