Memlekettik satyp alýlar týraly zań qabyldandy - Parlament
ASTANA. QazAqparat - Búgin Senattyń jalpy otyrysynda palata depýtattary «Memlekettik satyp alýlar týraly» QR Zańyn qabyldady. Qujat Ult josparynyń 56-y qadamyn júzege asyrýǵa baǵyttalady.
Qujattyń negizgi maqsaty memlekettik satyp alýlardyń tıimdi júıesin qurý bolyp tabylady, sonymen birge, qujat satyp alýlar erejesin jeńildetip, sybaılas jemqorlyq táýekelderin azaıtýdy qarastyrady. Atap aıtqanda, qujatta yqtımal taýar jetkizýshilerdiń quqyqtary men zańdy múddelerin qorǵaý jáne memlekettik satyp alýǵa qatysatyn taraptardyń jaýapkershiligin arttyrý sharalary kózdelip otyr.
«Zań jobasyna sáıkes, asa kóterińki baǵalar boıynsha bıýdjetti josparlaý problemasyn tek qana elektrondyq sharttar jasaý arqyly sheshý usynylyp otyr. Bul satyp alynatyn taýarlar boıynsha tolyq ári jetkilikti aqparat qalyptastyrýǵa, olardyń ortasha satyp alý baǵalaryn anyqtaýǵa múmkindik beredi. Osylaısha, tapsyrys berýshiniń bıýdjetteri praıs-paraqtar negizinde emes veb-portalda jasalǵan ortasha satyp alynatyn baǵalar negizinde qalyptasady»,- dedi Qarjy mınıstri Baqyt Sultanov.
Onyń aıtýynsha, zań jobasy boıynsha konkýrstyq qujattamalardy aldyn ala talqylaý ınstıtýty engiziledi. Bul norma ótinim berýshilerge tehnıkalyq talaptarmen aldyn ala tanysýǵa jáne olar boıynsha eskertýler bolǵan jaǵdaıda olardy joıý týraly ótinish berýge múmkindikti qamtamasyz etedi. Budan bólek, konkýrstan tys rásimderge qoıylatyn talaptar kóteriledi. Al sharttar jasasýdyń, taýarlardy berý týraly elektrondyq júk qujattarynyń, oryndalǵan jumystar men qyzmetter kórsetý aktileriniń jáne elektrondyq shot-faktýralardyń tek qana elektrondyq formaty engiziledi.
Memlekettik satyp alý qorytyndylaryna shaǵym jasaý merzimderi belgilenip, sol ýaqyt aralyǵynda sharttar jasasýǵa jol berilmeıtin bolady. Sonymen qatar, zań jobasynda tapsyrys berýshiniń ne ónim berýshiniń memlekettik satyp alý týraly shart boıynsha mindettemelerdi oryndamaǵany úshin aıyppul sanktsııalary da belgilengen.
«Memlekettik satyp alýlardyń ýaqytyly ótkizilmeý problemalary aldyn ala jyldyq satyp alý josparly ınstıtýtyn engizý arqyly sheshimin tabatyn bolady. Máselen, tapsyrys berýshilerge memelkettik satyp alýdy tıisti bıýdjet bekitilmesten buryn bıýdjet komıssııasynyń oń qorytyndysy negizinde júzege asyrýǵa múmkindik beredi. Bul sharalar bıýdjet qarajatyn ıgerilmeý problemalaryn sheshýge septigin tıgizbek», - dedi mınıstr Baqyt Sultanov. Onyń aıtýynsha, zań jobasymen bir kózden satyp alý úlesin tómendetý sharalary da qarastyrylyp otyr. Atap aıtqanda, mundaı satyp alýlardyń sany alpys segizden elý tórtke deıin qysqartylady. Bir kózden satyp alýǵa bolatyn talaptar qataıtylady.
Parlament qabyldaǵan zań Memleket basshysynyń qol qoıýyna joldaandy.
