Memlekettik satyp alýlar salasynda túıtkil kóp - Astana kásipkerleri
ASTANA. QazAqparat - Astana qalasynyń kásipkerler palatasy Kásipkerler quqyǵyn qorǵaý jáne sybaılas jemqorlyqqa qarsy qarsy is-qımyl keńesi memlekettik satyp alýlardy júzege asyrýda oryn alatyn túıtkildi máselelerdi talqylady, dep habarlaıdy QazAqparat tilshisi.
Astana qalasy kásipkerler palatasynyń sarapshysy Serik Mujyqovtyń aıtýynsha, elordalyq kásipkerler palatasyna memlekettik satyp alýlardy júzege asyrý barysynda memlekettik organdar men olarǵa qarasty mekemeleri tarapynan buzýshylyqtar oryn alǵany týraly kásipkerler jıi shaǵymdanady.
«2017 jyldyń basynan beri kásipkerler palatasyna bıznesti qorǵaý boıynsha 231 shaǵym tússe, onyń 20 paıyzdan astamy memlekettik satyp alýlardy júzege asyrýǵa baılanysty. Memlekettik organdar men olarǵa qarasty uıymdar tarapynan kásipkerlerdiń ótinimderin negizsiz qaıtarý, satyp alýlardy júzege asyrý tártibin buzý, baıqaý qujattaryna erejede qarastyrylmaǵan qosymsha talaptar qoıý sekildi buzýshylyqtar anyqtaldy», - deıdi sarapshy.
Sondaı-aq, keńes músheleri kásipkerdi memlekettik satyp alýlarǵa qatysý quqyǵynan aıyrý máselesiniń de ózekti bolyp otyrǵanyn atap ótti.
«QR «Memlekettik satyp alýlar týraly» zańyn buzǵan jaǵdaıda kásipkerlik sýbektileri zańnyń 12-baby, 6-bólimine sáıkes, memlekettik satyp alýlardyń senimsiz jetkizýshisi tizilimine 24 aıǵa engiziledi. ıAǵnı, barlyq zań buzýshy kásipkerler jasaǵan kinási men keltirgen shyǵyn kólemine qaramastan, 24 aıǵa «qara tizimge» enedi. Osy oraıda qalalyq kásipkerler palatasy Memlekettik satyp alýlardyń senimsiz jetkizýshileri tizilimine engizý merzimin kásipkerdiń jasaǵan aıybyna, keltirilgen shyǵynǵa qaraı saralaýdy usynady», - deıdi Astana kásipkerler palatasy Kásipkerler quqyǵyn qorǵaý jáne sybaılas jemqorlyqqa qarsy qarsy is-qımyl keńesiniń múshesi, advokat Bolat Keldibekov.
Onyń aıtýynsha, qoldanystaǵy zańnamada baıqaýdy uıymdastyrýshy Memlekettik satyp alýlar komıtetiniń buıryǵymen kásipkerdiń ózine habar bermesten, senimsiz jetkizýshiler tizilimine engize alady.
«Muny kásipker der ýaǵynda bilmeıdi jáne sheshimge qarsy shaǵymdaný merzimin ótkizip alady. Saldarynan ótkizip alǵan merzimdi qalpyna keltirý úshin uzaq protsedýralar júrgiziledi. Osyǵan baılanysty, kásipkerdi memlekettik satyp alýlar júıesine qatysý quqyǵynan aıyrý jazasy sot sheshimimen ǵana oryndalýy tıis», - dep usynys bildirdi Bolat Keldibekov.
Sonymen birge, Astana qalalyq kásipkerler palatasy dırektorynyń quqyqtyq máseleler jónindegi orynbasary Baýyrjan Beısenov kásipkerlerdiń memlekettik satyp alýlar júıesin jetik bilmeıtinin basa aıtty.
«Kóptegen kásipkerler memlekettik satyp alýlar júıesin jetik bilmeıdi. Budan memlekettik organdar da, kásipkerler de zardap shegýde. Osy oraıda, Astana kásipkerler palatasy bıznes ókilderi úshin memlekettik satyp alýlardy júzege asyrýdaǵy normalardy túsindiretin jáne quqyqtyq saýattylyqty arttyratyn semınarlar men trenıngterdi turaqty túrde ótkizip turýǵa daıyn», - dep óz sózin túıindedi B.Beısenov.
