Memlekettik satyp alýlar salasynda anyqtalǵan sybaılas jemqorlyqtyń basym bóligi ákimdikterge tıesili - Qarjy polıtsııasy
ASTANA. 2 sáýir. QazAqparat - Sybaılas jemqorlyq qylmystarynyń basym bóligi memlekettik satyp alýlar salasynda bolyp otyr.
Sońǵy tórt jyldyń ishinde osy salada bıýdjetke 7 mlrd. teńge shyǵyn keltirgen 2 myńǵa jýyq qylmys anyqtaldy. Bul týraly búgingi baspasóz máslıhatynda QR Ekonomıkalyq qylmys jáne sybaılas jemqorlyqqa qarsy kúres agentiginiń (Qarjy polıtsııasy) resmı ókili Murat Jumanbaı málim etti.
Onyń habarlaýynsha, ótken jyly memlekettik satyp alý salasynda anyqtalǵan sybaılas jemqorlyq qylmystarynyń (371) 78%-y ákimdikter jáne oǵan qarasty qurylymdyq bólimder qyzmetkerleriniń qatysýymen bolǵan. Al 26 qylmysty ákimderdiń ózderi nemese olardyń orynbasarlary jasady. «Mysaly, Mańǵystaý ákiminiń birinshi orynbasary Aıtqulov 12 jylǵa bas bostandyǵynan aıyryldy. Ol 2008-2012 jyldar aralyǵynda óziniń tanystary - «Ózenkqurylys» jáne «Adıl ı K» kásiporyndarynyń basshylary aǵaıyndy Sadyqovtarǵa qoldaý jasap, olardyń oblys aýmaǵynda áleýmettik nysandardy salý boıynsha memlekettik satyp alýlardyń konkýrstarynda jeńýge kómektesken. Oǵan qosa, Aıtqulov óziniń qyzmeti úshin Aqtaý qalasynda 64,3 mln.teńge turatyn úı salý jáne óziniń týǵan qyzyn úlesi 15% nemese 50 mln.teńgeni quraıtyn «JańaózenJibekJoly» JShS quryltaıshylarynyń qataryna kirgizý túrinde para alǵan», - dep atap kórsetti M.Jumanbaı.
Qarjy polıtsııasynyń taldaýyna sáıkes, memlekettik satyp alýlar salasyndaǵy sybaılas jemqorlyqtyń áreketteri qurylys jáne turǵyn úı-kommýnaldyq sharýashylyq qyzmeti boıynsha jıi bolady.
