Memlekettik satyp alýlar kezindegi jemqorlyq úshin sottalǵandar 40% artty - Alık Shpekbaev
ASTANA. QazAqparat - Memlekettik satyp alýlar kezinde sybaılas jemqorlyqqa jol bergeni úshin sotqa tartylǵandar sany 40% artty, dep habarlady Memlekettik qyzmet isteri jáne sybaılas jemqorlyqqa qarsy is-qımyl agenttigi tóraǵasynyń orynbasary Alık Shpekbaev.
«Tek 2017 jyldyń birinshi toqsanynda memlekettik satyp alýlar salasynda 73 sybaılas jemqorlyq qylmysy tirkeldi, onyń 32-si sotqa jiberildi. Jemqorlyqqa qarsy qyzmet derekterine sáıkes, bul salada sotqa tartylǵandar sany 40% ósken. Jemqorlyq qylmystar tenderlerdi úlestirýde, kelisimsharttar jasasýda, sondaı-aq atqarylǵan jumystar men tólem esebi boıynsha aktilerge qol qoıýda jol beriledi», - dedi ol búgin «Atameken» UKP Kásipkerler quqyǵyn qorǵaý jáne sybaılas jemqorlyqqa qarsy is-qımyl keńesiniń otyrysynda.
Onyń aıtýynsha, Ádep keńesiniń bıylǵy jyldyń alǵashqy toqsanyndaǵy jumys qorytyndysy memlekettik satyp alýlar kezinde zańnama buzyp, jaýapqa tartylǵan memqyzmetshiler sanynyń úsh esege óskenin kórsetken.
«Atameken» Ulttyq kásipkerler palatasymen birlesip júrgizgen saraptama nátıjesinde memlekettik satyp alýlar júıesinde jemqorlyq táýekelderin týdyratyn birqatar problemalar baryn anyqtadyq», - dep atap ótti A.Shpekbaev.
Onyń málimetterine sáıkes, memlekettik satyp alýlar salasyna jyl saıyn bıýdjetten qyrýar qarajat bólinedi. 2016 jyly memlekettik satyp alýlar somasy 2,2 trln.-nan astam teńgeni qurady.
