Memlekettik satyp alýlar biryńǵaı uıymdastyrýshy arqyly júzege asatyn bolady
ASTANA. 26 jeltoqsan. QazAqparat - Búgin QR Parlamenti Senatynyń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine memlekettik satyp alý máseleleri boıynsha ózgerister men tolyqtyrýlar engizý týraly» zań jobasyn birinshi oqylymda maquldandy.
Qujat palatanyń búgingi otyrysynda ekinshi oqylymda qaralady dep josparlanyp otyr.
Zań jobasyna sáıkes, qoldanystaǵy zańnama normasyn qoldanbaı memlekettiń qatysýy bar zańdy tulǵalardan taýarlardy, jumystar men kórsetiletin qyzmetterdi satyp alý kezinde olardyń jasyryn monopolııasyn bolǵyzbaý, taýarlarǵa, jumystar men kórsetiletin qyzmetterge baǵalardyń biryńǵaı aqparattyq júıesin qurý qarastyrylady. Budan bólek, qujat boıynsha sybaılas jemqorlyqty azaıtý, ónim berýshini biliktilik turǵydan irikteýge baqylaýdy kúsheıtý sharalary qamtylady. Bul rette Úkimettiń, jergilikti atqarýshy organdardyń sheshimimen aıqyndalǵan bıýdjettik baǵdarlamalar jáne taýarlar, jumystar men kórsetiletin qyzmetter boıynsha konkýrs tásilimen memlekettik satyp alýdy uıymdastyrý men ótkizý úshin Úkimet, oblys, respýblıkalyq mańyzy bar qala men astana ákimdikteriniń memlekettik satyp alýdy biryńǵaı uıymdastyrýshysyn qurý usynylady.
Sonymen qatar, Qazaqstan, Reseı men Belarýs arasyndaǵy Biryńǵaı ekonomıkalyq keńistiginiń quqyqtyq bazasyn qalyptastyrý sheńberinde jasalǵan Memlekettik (mýnıtsıpaldyq) satyp alý týraly kelisimge oraı, memlekettik satyp alýdy júzege asyrý kezinde ulttyq rejımdi engizý kózdeledi. Jalpy ulttyq rejım 2014 jyldyń 1 qańtarynan engiziledi. Ulttyq rejımde memlekettik satyp alýlarǵa otandyq óndirýshilermen qatar sheteldik óndirýshilerdiń qatysýy qarastyrylady. Sondaı-aq, ulttyq rejımdi engizý aıasynda Úkimettiń quzyreti aıqyndalady. Máselen, Úkimet memlekettik satyp alý úderisine tyıym salýdy belgileı alady. ıAǵnı, eki jyldan aspaıtyn mezgilde elimizde shyǵarylatyn belgili bir taýar men onyń jetkizýshisi aıqyndalady. Ekinshiden, Úkimet memlekettik satyp alý úderisine shekteýdi belgileı alady. Mundaı satyp alýlarǵa Úkimet bekitken tizbege sáıkes, Keden odaǵynyń elderiniń ónim berýshileri ǵana qatysýy qarastyrylady. Sosyn Úkimet memlekettik satyp alýlarǵa sharttardy da belgileıdi, bunda da jeńildikter Keden odaǵynyń ónim berýshilerine ǵana usynylady.
Budan bólek, qujatta memlekettik satyp alýlar barysynda baǵamen aıqyndaýdan sapasyna qaraýǵa qaraı kóshý kózdeledi. Bul rette tehnıkalyq erekshelikti baǵalaý kezinde ónim óndirýshilerdiń eń jaqsy usynystaryn irikteý usynylady. Qujatty ázirleýshilerdiń pikirinshe, bul sapasyz taýarlardy jáne qyzmetterdi satyp alýdyń jolyn kesedi.
Sonymen qatar, zań jobasynda áleýetti ónim óndirýshilerdiń jekelegen sanattaryna, atap aıtqanda elimizdegi múgedekter qoǵamdyq birlestikterin qurǵan taýarlar óndiretin, jumystar oryndaıtyn uıymdarǵa, túzeý mekemeleriniń memlekettik kásiporyndaryna, shaǵyn kásipkerlik sýbektilerine memlekettik satyp alýlarda artyqshylyqtar berý kózdeledi.
Jalpy zań jobasy básekelestikti qamtamasyz etýge, sybaılas jemqorlyqty tómendetýge, satyp alýlardyń tıimdiligin arttyrýǵa baǵyttalady. Senat zań jobasyn birinshi oqylymda tujyrymdamaly túrde maquldady.
