Memlekettik satyp alýdyń elektrondyq aýktsıon tásili engiziletin bolady
ASTANA. 3 qarasha. QazAqparat /Qanat Mámetqazyuly/ - Búgin QR Parlamenti Májilisinde «Qazaqstan Respýblıkasynyń keıbir zańnamalyq aktilerine memlekettik satyp alý máseleleri boıynsha ózgerister men tolyqtyrýlar engizý týraly» zań jobasynyń tanystyrylymy bolyp ótti.
«Buǵan deıin Qazaqstan, Belarýs jáne Reseı Úkimetteri arasynda Memlekettik (mýnıtsıpaldyq) satyp alý týraly kelisim jasalǵan bolatyn. Kelisimniń 17-babyna sáıkes, qujatty iske asyrý kezeń-kezeńmen júzege asady. Bul rette ekinshi kezeń (Qazaqstan Respýblıkasy úshin) 2012 jylǵy 1 shildege deıin belgilengen. Osyǵan baılanysty «Memlekettik satyp alý týraly» zańǵa ózgerister engizý kózdelip otyr», - deıdi zań jobasyn tanystyrǵan Qarjy mınıstri Bolat Jámishev.
Onyń aıtýynsha, zań jobasymen elektrondyq aýktsıon sekildi memlekettik satyp alýdyń jańa tásilin engizý usynylady. Elektrondyq aýktsıon osyndaı aýktsıon mániniń baǵasyn tómendetý jolymen memlekettik satyp alý veb-portaly arqyly naqty ýaqyt rejıminde júrgiziletin bolady. Mınıstrdiń sózine qaraǵanda, elektrondyq aýktsıondy engizý memlekettik satyp alýlardyń «ashyqtyǵyn», konkýrstyq satyp alýdy ótkizýdi uıymdastyrýǵa baılanysty shyǵyndardy qysqartý esebinen bıýdjet qarajatyn únemdeýdi qamtamasyz etedi. Budan bólek, ótinim berýshilerdi habardar etý esebinen satyp alý baǵasyn tómendetý men básekelestikti kúsheıtý sharalary kútiledi.
