Memlekettik satyp alýdyń biryńǵaı uıymdastyrýshysy 2014 jyldan bastap jumys isteıdi
ASTANA. 11 qarasha. QazAqparat - Búgin Parlament Májilisinde «Qazaqstan Respýblıkasynyń keıbir zańnamalyq aktilerine memlekettik satyp alý máseleleri boıynsha ózgerister men tolyqtyrýlar engizý týraly» zań jobasynyń tanystyrylymy bolyp ótti. Zań jobasy elimizdegi memlekettik satyp alýdyń biryńǵaı uıymdastyrýshysyn qurýdy kózdeıdi. Esterińizge sala keteıik, mundaı tapsyrmany QR Prezıdenti Úkimetke júktegen bolatyn.
Atap aıtqanda, zań jobasymen memlekettik satyp alýdyń biryńǵaı operatoryn qurý jáne memlekettik satyp alýdyń elektrondyq júıesin jetildirý múmkindigi qarastyrylady. Sonymen qatar, osy negizde Úkimettiń, ákimderdiń memlekettik satyp alýdyń biryńǵaı uıymdastyrýshysyn qurý kózdelip otyr. Al atalmysh operatordyń quzyretine Úkimettiń, jergilikti atqarýshy organdardyń sheshimimen aıqyndalatyn bıýdjettik baǵdarlamalar jáne taýarlar, jumystar, kórsetiletin qyzmetter boıynsha konkýrs jáne aýktsıon tásilderimen memlekettik satyp alýdy uıymdastyrý jáne ótkizý rásimderin oryndaý máseleleri kiretin bolady. Budan bólek, memlekettik satyp alýdyń biryńǵaı uıymdastyrýshysy respýblıkalyq deńgeıde 2014 jyldyń 1 qańtarynan, al jergilikti deńgeıde 2015 jyldyń 1 qańtarynan qurylady dep josparlanyp otyr.
Qarjy vıtse-mınıstri Berik Sholpanqulovtyń aıtýynsha, zań jobasynda qamtylǵan normalardyń maqsaty tapsyrys berýshi men memlekettik satyp alýdy biryńǵaı uıymdastyrýshy arasyndaǵy ózara baqylaýdy kúsheıtý nátıjesinde sybaılas jemqorlyq tekseristerin barynsha azaıtý bolyp tabylady. «Budan bólek, memlekettik satyp alý úderisine qatysýshy memlekettik organdardyń fýnktsııalaryn qurý nátıjesinde uıymdastyrýshylar men tapsyrys berýshilerge qatysty ózara zańsyz is-qımyldardy boldyrmaý tetigin jetildirý bolyp tabylady», - deıdi B.Sholpanqulov. Osyǵan oraı, zań jobasynda memlekettik satyp alýdyń biryńǵaı uıymdastyrýshysynyń quzyreti men tapsyrys berýshiniń ókilettikteri aıqyndalady.
Budan bólek, Qazaqstanda memlekettik satyp alýlardy ótkizý úshin taýarlar, jumystar men qyzmetterdiń biregeı aqparattyq júıesi qurylatyn bolady. Bul rette satyp alynatyn taýarlardyń, jumystar men qyzmetter baǵalarynyń biryńǵaı aqparattyq júıesi arnaıy anyqtamaǵa negizdeletini kózdelip otyr.
