Memlekettik satyp alýdy jetildirýge qatysty jumys toby quryldy
ASTANA. QazAqparat – Memlekettik satyp alýdy jetildirýge qatysty jumys toby quryldy. Bul týraly Úkimet otyrysynda QR Premer-Mınıstriniń orynbasary – Qarjy mınıstri Erulan Jamaýbaev aıtty, dep habarlaıdy QazAqparat tilshisi.
«Memlekettik satyp alýdy jetildirýge qatysty Parlament depýtattary, memlekettik organdar, «Atameken» ulttyq kásipkerlik palatasy, bıznes-qoǵamdastyq jáne halyqaralyq uıymdardyń ókilderi qatarynan jumys toby quryldy. Saraptamalyq fokýs-top problemalyq máselelerdi anyqtaý turǵysynan zańnamaǵa taldaý júrgizdi jáne jańa zańnyń negizgi tásilderin ázirleýde», - dedi Erulan Jamaýbaev.
Onyń atap ótýinshe, halyqaralyq sarapshylardyń usynystary da talqylanǵan.
«Zań jobasyna tujyrymdama da ázirlenip jatyr. Óz kezeginde biryńǵaı platformany qoldanystaǵy Memlekettik satyp alý veb-portaly negizinde iske asyrý josparlanýda», - dedi ol.
