Memlekettik satyp alýdy jetildirý zańyna qandaı ózgerister engizildi

ASTANA. QazAqparat - QR Qarjy mınıstrligi Memleket basshysy qol qoıǵan «Memlekettik satyp alýdy jetildirý týraly» Zańǵa qandaı tolyqtyrýlar engizilgenin túsindirip berdi, dep habarlaıdy QazAqparat tilshisi.

Atap aıtqanda, bir kózden satyp alýdyń shekti somasy 100 aılyq eseptik kórsetkishten 500 AEK-ke deıin ulǵaıtyldy (240 500 teńgeden 1 202 500 myń teńgege deıin). Odan bólek, 1000 AEK-ke deıingi satyp alýda tapsyrys berýshiler taýarlardyń fırmalyq ataýlary kórsetse alady. Bul, mınıstrliktiń pikirinshe, satyp alynatyn taýarlardyń sapasyn arttyrýǵa kómektesedi.

«Bul qazirgi ýaqyttaǵy baǵa usynystarymen satyp alýda sapasyz taýarlardy jetkizý máselesimen negizdelgen. Mundaı ónim tehnıkalyq erekshelikke kórsetilgen sıpattamalarǵa saı kelmeıdi. Taýarlardy qabyldap, qoldanýǵa bergende-aq isten shyǵady», - dedi QR Qarjy mınıstrligi Zańnama departamentiniń dırektory Sábıt Ahmetov mınıstrlikte ótken brıfıngte.

Zańǵa sáıkes, yqtımal jetkizýshige «qarjylyq turaqtylyq» dep atalatyn jańa biliktilik talaby qoıylady. Ol tólegen salyqtar, aınalymdyq jáne negizgi qarajattyń bolýy jáne eńbekaqy tóleý qory arqyly anyqtalady.

Sonymen birge, jańa qabyldanǵan Zańda «kásibı shaǵymdanýshylardyń» jolyn kesý de kózdelip otyr. ıAǵnı, olardyń satyp alý nıeti joq, tek qana ótinimderdi ózara qaraý sheńberinde basqa qatysýshylardyń aqparatyna qol jetkizý úshin ótinim beredi. Mundaı jaǵdaıdy boldyrmaý úshin basqa qatysýshylardyń qujattaryn qaraýǵa tyıym salynady, konkýrstyq qujattamany aldyn ala talqylaýǵa qatyspaǵan taýar jetkizýshilerdiń aryz-shaǵymy qaralmaıdy. Sondaı-aq, satyp alýǵa qatyspaǵan úshinshi tulǵalardyń shaǵymdary boıynsha shart jasasý merzimi toqtatylmaıdy.

Zańdaǵy eń negizgi jańalyq - memlekettik satyp alýlar veb-portalyn paıdalanýdyń aqyly túrge aýysýy. S. Ahmetovtyń aıtýynsha, satyp alýlarǵa qatysý úshin jarna somasy satyp alý somasyna tikeleı baılanysty bolmaq. 1 mıllıon teńgege deıin - jylyna 1 AEK, 10 mıllıon teńgege deıin - jylyna 10 AEK, 100 mıllıon teńgege deıin - 20 AEK, 1 mıllıard teńgege deıin - jylyna 60 AEK. Al eger, sheksiz soma bolsa - jylyna 122 AEK tóleý mindettelgen.

«Konkýrs qorytyndysyn qaraýda esh másele joq. Biraq, qatysýǵa ótinim bererde qatysýshynyń aqy tólegeni tekseriledi. Shaǵyn jáne orta bıznesti qorǵaý úshin yqtımal taýar jetkizýshiler túrli teńgeıde shektelgen.

1 mıllıon teńgege deıingi satyp alýǵa qatysatyn ShOB 1 AEK nemese 2,5 myń teńge tóleıdi. Bul árbir satyp alýǵa emes, jylyna bir ret qana tólenedi. Elimizde dál osyndaı 37, 726 jetkizýshi bar», - dep tolyqtyrdy sózin ol.

Eger jetkizýshi kórsetilgen somadan asatyn ózge de satyp alýǵa qatysqysy kelse, jetpeı turǵan qarajatty ǵana tóleıdi.