Memlekettik satyp alýda 23 mlrd teńgeniń qarjylyq buzýshylyqtary anyqtaldy

NUR-SULTAN. QazAqparat – Jyl basynan beri memlekettik satyp alý salasynda 23 mlrd teńgeniń qarjylyq buzýshylyqtary anyqtaldy. Bul týraly búgin Úkimet otyrysynda QR Qarjy mınıstri Erulan Jamaýbaev aıtty, dep habarlaıdy QazAqparat tilshisi.

«Osy jyldyń 2 aıynda kameraldyq baqylaýmen somasy 2,3 trln teńgege 213 myńnan astam memlekettik satyp alý rásimi qamtyldy. Tekserýlerdiń qorytyndylary boıynsha 6 153 rásim boıynsha buzýshylyqtar anyqtaldy. Memlekettik aýdıt obektileri buzýshylyqtardy joıý týraly 5 600 habarlamany oryndady», - dedi 2021 jyldyń qańtar-aqpanyndaǵy respýblıkalyq bıýdjettiń oryndalýy jaıynda baıandaǵan mınıstr.

Onyń dereginshe, 491 aýdıtorlyq is-sharalar ótkizildi. Aýdıtpen 237 mlrd teńge bıýdjet qarajaty qamtyldy.

«Somasy 23 mlrd teńgege qarjylyq buzýshylyqtar anyqtaldy. Taýarlardy jetkizýmen, qyzmetterdi kórsetýmen jáne jumystardy oryndaýmen qalpyna keltirý, bıýdjetke óteý jáne esepke alý boıynsha kórsetý jolymen 12 mlrd teńgege buzýshylyqtar joıyldy. Aýdıt nysandary qyzmetiniń tıimdiligin jetildirý jáne arttyrý úshin 395 usynym berildi», - dedi ol.