Memlekettik satyp alýda 16 mlrd teńgege baǵany qoldan ósirý jaıty anyqtaldy

NUR-SULTAN. QazAqparat – Memlekettik satyp alý salasyna qoǵamdyq baqylaý júrgizý barysynda birneshe zańbuzýshylyq anyqtalyp, nátıjesinde 40 hattama toltyryldy. Sonymen qatar 12 qylmystyq is qozǵaldy. Bul týraly «El namysy» arnaıy monıtorıngilik tobynyń múshesi Dıdar Smaǵulov málim etti, dep habarlaıdy QazAqparat tilshisi.

«Bizdiń qoǵamdyq uıym jumysyn bastaǵaly elimizde 13,5 myńnan astam azamattyń qatysýymen 500-den astam kezdesý ótti. Onyń ishinde 615 azamattyń máselesi jeke qaraldy. Ár azamattyń ótinishi men máselesine tıisti keńes berilip, quzyrly organdarǵa hat joldandy. Keıbir jaıttar sol jerde sheshimin taýyp jatty. Qazir qolymyzda bar málimetke sáıkes, sheneýnikterge qatysty 145 ákimshilik jaýapqa tartý hattamasy toltyryldy. Salynǵan jalpy aıyppul kólemi 40 mln teńgeden asady. Zańbuzýshylyqqa kelsek, jaýapqa tartylǵan sheneýnikter nemese memlekettik qyzmetkerlerdiń jartysy negizgi jumysynan bólek, kásipkerlikpen aınalysqan», - dedi Dıdar Smaǵulov Ortalyq kommýnıkatsııalar qyzmeti alańynda ótken baspasóz máslıhatynda.

Monıtorıngilik top múshesiniń málimetinshe, qoǵamdyq baqylaý barysynda memlekettik satyp alý salasynda da zańbuzýshylyqtar anyqtaldy.

«Joǵaryda atalǵan 145 hattamanyń 40-y — memlekettik satyp alýǵa qatysty. Nátıjesinde 16 mlrd teńgeden astam somaǵa memlekettik satyp alý baǵasyn qoldan ósirý jaıty anyqtalyp, 12 qylmystyq is qozǵaldy. Mysaly, Aqtóbe qalasyndaǵy sport mektebi dırektorynyń orynbasary negizgi jumysynan bólek jeke kásipker retinde memlekettik satyp alýmen aınalysqan. Sóıtip, basqa sporttyq mektepterge qyzmetin usynyp kelgen. Nátıjesinde aıyptynyń zańsyz tabysy tárkilenip, oǵan 428 myń teńge aıyppul salyndy. Sonymen qosa atalǵan azamat memlekettik satyp alýmen qatar, jetkizýshi rólin de atqarǵan», - deıdi ol.

Buǵan deıin temirtaýlyq tergeýshiniń qylmystyq isti toqtatý úshin kúdiktiden aqsha alǵany týraly habarlaǵan edik.

Aıta keteıik, bıyl jyl basynda elimizde «El namysy» atty arnaıy monıtorıngilik top quryldy.

Atalǵan qoǵamdyq uıymnyń maqsaty – Prezıdent tapsyrmalarynyń oryndalý barysyn baqylaý.