Memlekettik satyp alý júıesine ortalyqtandyrylǵan qyzmet qaǵıdaty engiziledi - Elbasy
ASTANA. QazAqparat - Úkimetke memlekettik satyp alý júıesin ortalyqtandyrylǵan qyzmet qaǵıdaty boıynsha engizý tapsyryldy. Bul týraly búgin jarııalanǵan Prezıdent Nursultan Nazarbaevtyń «Qazaqstannyń úshinshi jańǵyrýy: jahandyq básekege qabilettilik» atty el halqyna arnaǵan Joldaýynda aıtylǵan.
«Biz eldegi sybaılas jemqorlyq deńgeıin tómendetý baǵytynda eleýli qadamdar jasadyq. Alaıda, basty nazar kóbine sybaılas jemqorlyqtyń saldarlarymen kúresýge aýdarylyp otyr. Sybaılas jemqorlyqtyń sebepteri men alǵysharttaryn anyqtap, olardy joıý jumysyn kúsheıtý qajet», - dedi Elbasy.
QR Prezıdenti kelesi mańyzdy máseleniń biri retinde satyp alý salasyn jetildirýge basa nazar aýdarǵan. «Úkimetke memlekettik satyp alý júıesin ortalyqtandyrylǵan qyzmet qaǵıdaty boıynsha engizýdi tapsyramyn. Kvazımemlekettik sektorda, tabıǵı monopolııa jáne jer qoınaýyn paıdalaný salalarynda da satyp alý sharalaryn ótkizý ádisterin túbegeıli qaıta qarastyrý kerek», - dep atap ótti Memleket basshysy.
Sonymen qatar Nursultan Nazarbaev sybaılas jemqorlyqpen kúreste kóp nárse búkil qoǵamnyń belsene atsalysýyna baılanysty ekendigin basa aıtty.
«Áleýmettik jeliniń, ózge de medıa-resýrstardyń damýy jaǵdaıynda, sybaılas jemqorlyqqa qarsy is-áreket barysynda ony jalpy jurtshylyqtyń jek kórýi kúrestiń qýatty quralyna aınalýǵa tıis», - dedi Qazaqstan Prezıdenti.
