Memlekettik satyp alý zańnamasyna tolyqtyrýlar maquldandy - Májilis

NUR-SULTAN. QazAqparat – Parlament Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine memlekettik satyp alý máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldandy, dep habarlaıdy QazAqparat tilshisi.

«Zań jobasy 2019 jylǵy 21 tamyzda Tuńǵysh Prezıdent- Elbasynyń «Nur Otan» partııasynyń keńeıtilgen otyrysynda bergen tapsyrmasyn jáne Memleket basshysynyń Saılaýaldy baǵdarlamasynda memlekettik satyp alýdy jetildirýge qatysty bergen tapsyrmasyna sáıkes ázirlendi. Zań jobasyna engiziletin túzetýler 3 negizgi bólikten turady: memlekettik satyp alý zańnamasyn jetildirý, sybaılas jemqorlyq táýekelderin tómendetý, bir kózden satyp alýdy azaıtý», - dedi QR Qarjy mınıstri Erulan Jamaýbaev.

Onyń aıtýynsha, memlekettik satyp alý zańnamasyn jetildirý aıasynda konkýrs túrindegi satyp alýdyń jańa tásili retinde aldyn ala kelisimdi qoldaný qarastyrylǵan. Bul tásil 2 kezeńnen turady.

«Birinshi kezeńde talaptarǵa sáıkes keletin áleýetti ónim berýshiler iriktelip, olarmen aldyn ala kelisim jasalady. Ekinshi kezeńde tapsyrys berýshiler aldyn ala kelisimniń qatysýshylaryna taýarlar, jumystar men qyzmetterdi satyp alýǵa tapsyrys jiberedi. Kelisimshart eń tómen baǵa usynǵan áleýetti ónim berýshimen jasalady. Ádette, aldyn ala kelisim jasasý arqyly kantselıarlyq jáne sharýashylyq taýarlary, tehnıka, janar-jaǵarmaı, baılanys qyzmeti men ınternet jelisine qosylý jáne sol sııaqty standartty taýarlar men qyzmetter satyp alynady», - dedi mınıstr.

Usynylyp otyrǵan ádis satyp alý rásimderin 5 jumys kúnine deıin azaıtýǵa múmkindik beredi.

Budan bólek, sybaılas jemqorlyq táýekelderin tómendetý aıasynda zań jobasymen Reıtıngtik-baldyq júıe arqyly konkýrs tásilin engizý usynylady. Atalǵan tásil memlekettik satyp alý rásimine adamnyń qatysýyn shekteýge, satyp alýdy konkýrstyq komıssııasyz júzege asyrýǵa múmkindik beredi. Bir kózden satyp alýdy azaıtý aıasynda qujat bir kózden satyp alýdyń 52 negizdemesiniń úsheýin qysqartýdy kózdep otyr.

«Bul rette, quny 100 aılyq eseptik kórsetkishten aspaıtyn bir kózden satyp alýlar joıylyp (39-baptyń 3-tarmaǵynyń 42) tarmaqshasy), osyndaı satyp alýlar Elektrondy dúken arqyly satyp alýdyń jańa tásilimen orny toltyrylady. Elektrondy dúkenniń ereksheligi tapsyrys berýshige ózine qajetti taýardy tańdaý erkindigin beredi jáne mundaı taýardyń jetkizip berýshisi eń tómen baǵa negizinde anyqtalady. Bul bir jaǵynan, sapaly taýarlardy satyp alýǵa múkindik berse, ekinshi jaǵynan, tapsyrys berýshiler men ónim berýshiler tarapynan táýekelder men teris paıdalaný jaǵdaılaryna jol bermeıdi», - dedi Erulan Jamaýbaev.