Memlekettik satyp alý: Túrkistan oblysynda 372 mln teńge únemdelgen
TÚRKІSTAN. QazAqparat – Túrkistan oblysynda «Memlekettik satyp alýdyń biryńǵaı terezesi» aqparattyq-taldaý júıesi arqyly satyp alý salasyna júrgizilgen monıtorıngilik jumystar júrgizilgen. Júıeli jumystardyń nátıjesinde 5 aıda jalpy sommasy 372 mln teńgege jýyq bıýdjet qarjysy únemdelgen, dep habarlaıdy QazAqparat tilshisi.
Sybaılas jemqorlyqqa qarsy is-qımyl agenttigi Túrkistan oblysy boıynsha departamenti basshysynyń birinshi orynbasary Mıras Qarǵabaıdyń aıtýynsha, zerdeleý jumystarynyń nátıjesinde memlekettik organdar men kvazımemlekettik sektor sýbektileri josparlaǵan memlekettik satyp alýda negizsiz baǵany ósirý faktileri kórinis tapqan.
Qabyldanǵan usynystardyń qorytyndysymen monıtorıng nátıjesinde óńirdegi birqatar mekemelerge josparlanǵan somany medıandyq baǵaǵa keltirip, qaıta engizý tapsyrylǵan.
Máselen, Keles aýdanynyń bilim bólimi mekemege qajetti VD-AK-111 markalyq boıaý alý barysynda 19 mln 610 myń teńge bıýdjet qarajaty únemdelgen.
Sondaı-aq, Jetisaı aýdanynyń bilim bóliminde de kompıýter satyp alý kezinde 6 mln 991 myń teńgeni únemdep qalǵan.
Aıta keteıik, jyl basynan beri atalǵan júıeni qoldaný arqyly bıýdjet qarajatyn maqsatsyz shyǵyndaý derekteriniń jolyn kesilip otyr.
Departament qyzmetkerleri aldaǵy ýaqytta da bıýdjet qarajatynyń tıimsiz jumsalýyna jol bermeı, osy baǵytta monıtorıng jumystaryn júıeli túrde júrgizbek.
