Memlekettik satyp alý tártibinen tikeleı shart jasaýdyń 4 negizdemesin alyp tastaý usynyldy
Zań jobasyn Senat depýtattaryna QR Qarjy mınıstri Erulan Jamaýbaev tanystyrdy.
«Qazaqstan Respýblıkasynyń keıbir zańnamalyq aktilerine memlekettik satyp alý, jer qoınaýyn paıdalanýshylar men tabıǵı monopolııalar sýbektileriniń satyp alýy, baılanys, avtomobıl kóligi men qorǵanys máseleleri boıynsha ózgerister men tolyqtyrýlar engizý týraly» zań jobasy usynylyp otyr.
Zań jobasy QR Prezıdentti Qasym-Jomart Toqaevtyń memlekettik satyp alýdy jetildirý, onyń ishinde olardy ótkizýdi ortalyqtandyrý, tıimdiligin, ashyqtyǵyn arttyrý jáne sybaılas jemqorlyq táýekelderin tómendetý jónindegi tapsyrmasyn oryndaý maqsatynda ázirlendi», - degen mınıstr qujat jobasy 4 negizgi túzetýlerdi qamtıtynyn atady.
Olar:
- bir kózden satyp alýdy qysqartý;
- sybaılas jemqorlyq táýekelderdi tómendetý;
- memlekettik satyp alý týraly zańnamany jetildirý;
- jer qoınaýyn paıdalanýshylardyń, tabıǵı monopolııalar sýbektileriniń, baılanysty, avtomobıl kóligi men qorǵanys satyp alýyn jetildirý.
«Bir kózden satyp alýdy qysqartý baǵytynda zań jobasynda tikeleı shart jasasýdyń 52 negizinen 4 negizin alyp tastaý usynylady.
Birqatar negizder is júzinde qoldanylmaıdy, al memlekettik bilim berý tapsyrysy shyn máninde memlekettik satyp alý bolyp tabylmaıdy. Memlekettik bilim berý tapsyrysyn alyp tastaý bir kózden satyp alý kólemin edáýir qysqartady. Sonymen qatar, memlekettik satyp alý týraly shartty tikeleı jasasý Zańnyń 39-baby 3-tarmaǵynyń 42) tarmaqshasy sheńberinde kóptep júrgiziledi. Bul mańyzdylyǵy tómen satyp alýlar sany jaǵynan bir kózden satyp alýlar kóleminiń edáýir bóligin quraıdy, sondaı-aq sybaılas jemqorlyq táýekelderine beıim bolyp tabylady.
Osyǵan baılanysty, zań jobasymen 100 aılyq eseptik kórsetkishke deıingi taýarlardy, sondaı-aq 500 aılyq eseptik kórsetkishke deıingi jumystar men kórsetiletin qyzmetterdi satyp alýǵa qatysty negizdemeni alyp tastaý usynylady», - dedi Qaryjy mınıstri.