Memlekettik satyp alý talaptaryn saqtamaǵan basshy qyzmetinen bosatyldy

ORAL. QazAqparat - Memlekettik qyzmetke kir keltiretin tártiptik teris qylyqtarǵa jol bergeni úshin Aqjaıyq aýdandyq bilim berý bóliminiń basshysy Mereke Zınalıev qyzmetinen bosatyldy, dep habarlaıdy «QazAqparat» HAA tilshisi.

BQO prokýratýrasynyń baspasóz qyzmetinen túsken málimetke qaraǵanda, M.Zınalıev balalardyń jańajyldyq shyrshasyna syılyqtardy satyp alý kezinde «Memlekettik satyp alý týraly» Zań talaptaryn buzǵan. Atap aıtqanda, tıisti memlekettik satyp alý konkýrsyn ótkizbeı, jeke kásipkerlermen bir kózden taýar satyp alýǵa zańsyz kelisim-shart jasaǵan.

Eske sala keteıik, M.Zınalıevtiń tártiptik isi aýdan prokýratýrasynyń usynysy negizinde budan buryn QR Memlekettik qyzmet isteri jáne sybaılas jemqorlyqqa qarsy is-qımyl agenttigi BQO-daǵy ádep jónindegi keńesiniń otyrysynda qaralyp, qoldaý tapqan bolatyn.