Memlekettik satyp alý sybaılas jemqorlyq etek alǵan salalardyń biri bolyp otyr - G.Ábdiqalyqova

ASTANA. QazAqparat - Aqordada QR Memlekettik hatshysy Gúlshara Ábdiqalyqovanyń tóraǵalyǵymen QR Prezıdenti janyndaǵy Sybaılas jemqorlyqqa qarsy kúres máseleleri jónindegi komıssııanyń otyrysy ótýde.

Otyrysta Ekonomıkalyq yntymaqtastyq jáne damý uıymynyń Sybaılas jemqorlyqqa qarsy kúres jónindegi Ystambul is-qımyldar josparynyń usynymdaryn oryndaý, sondaı-aq memlekettik satyp alý rásimderin ótkizý kezinde sybaılas jemqorlyqtyń aldyn alý boıynsha memlekettik organdar qolǵa alǵan sharalar talqylanbaq.

Jıynda ashqan G.Ábdiqalyqova óz sózinde sybaılas jemqorlyqqa qarsy tetikterdiń tıimdiligi Elbasy N.Nazarbaev usynǵan elimizdi jan-jaqty jańǵyrtýǵa baǵyttalǵan Ult josparyn tabysty iske asyrýdyń birden-bir sharty bolyp tabylatynyn atap ótti. Sybaılas jemqorlyqqa qarsy jemisti is-qımyl jasaýda halyqaralyq talaptar eskerilgen jemqorlyqqa qarsy zańnamany jetildirýge erekshe ról beriledi. Qazaqstan halyqaralyq sybaılas jemqorlyqqa qarsy konventsııalarǵa qosylý, sonymen qatar Ystambul is-qımyldar josparynyń usynymdaryn oryndaý boıynsha jumysty júıeli túrde júzege asyrýda. Atalǵan ustanymdardy oryndaý mańyzdy strategııalyq mánge ıe. Óıtkeni, Qazaqstan EYDU múshesi bolýdy josparlap otyr.

Sondaı-aq Memlekettik hatshy búginde memlekettik satyp alý sybaılas jemqorlyq etek alǵan salalardyń biri bolyp otyrǵandyǵyn aıtty. G.Ábdiqalyqova qalyptasqan jaǵdaı memlekettik satyp alý salasynda sheshimder qabyldaýdyń aıqyndylyǵyn, onyń ishinde osy protsesterge qoǵamdyq baqylaýdy kúsheıtýdi jáne elektrondyq resýrstardyń múmkindikterin keńinen paıdalanýdy kózdeıtin qosymsha uıymdastyrýshylyq-quqyqtyq tetikter ázirleý qajettigin talap etetinin atap ótti.

Otyrys barysynda Memlekettik qyzmet isteri jáne sybaılas jemqorlyqqa qarsy is-qımyl agenttigi tóraǵasynyń orynbasary A.Shpekbaevtyń, Qarjy vıtse-mınıstri R.Beketaevtyń, «Atameken» Ulttyq kásipkerler palatasy tóraǵasynyń orynbasary R.Júrsinovtiń esepteri tyńdalmaq.