Memlekettik satyp alý saıasatynda ındýstrııalyq sertıfıkattyń ornyna jańa tetik engiziledi
Saýda jáne ıntegratsııa mınıstrligi konsýltatıvtik qujatqa osyndaı túzetý engizýdi usynyp otyr.
Bul máseleni arnaıy jumys tobyn quryp zerttegen mınıstrlik ındýstrııalyq sertıfıkat shekteýli óndirýshilerdiń múddesine tıimdi talaptardy qalyptastyrý tetigine aınalǵanyn anyqtaǵan.
Osy arqyly kóptegen ımporttyq taýardy qazaqstandyq dep taný táýekeli paıda bolǵan. Osyndaı taýardy óndiriske qoldanǵan kompanııa memlekettik qoldaý sharalaryn alýǵa quqyq alyp otyrǵan.
Indýstrııalyq sertıfıkattar «Atameken» ulttyq kásipkerlik korporatsııasy arqyly beriledi. Al Saýda jáne ıntegratsııa mınıstrliginiń ol sertıfıkatty berýge negiz bolǵan qujattardy tekseretin quzyreti joq.
Vedomstvo sarapshylarynyń aıtýynsha, mundaı saıasat EAEO elderinen ákelingen taýarlardyń naqty ákelý baǵasyn tekserýge múmkindik bermeıdi.
«Sertıfıkattardy berýdi UKP is júzinde óndirýshini de, sarapshy-aýdıtordy da teksere otyryp, atalǵan kásipkerlik sýbektileriniń qyzmetine aralasyp, olardyń quqyqtary men zańdy múddelerin buza otyryp júzege asyrady. Buǵan «Qazaqstan Respýblıkasynyń Ulttyq Kásipkerler palatasy týraly» QR Zańynyń 28-babynyń 5-tarmaǵynda tikeleı tyıym salynǵan.
Ekinshi jaǵynan, «Atameken» UKP bıznestiń múddelerin qorǵaýǵa mindetti. Bul onyń qabyldaǵan sheshimderiniń obektıvtiligine teris áser etedi», - dep jazylǵan qujat jobasynda.
Konsýltatıvtik qujat jobasynda «Qazaqstandyq taýarlar tizilimin» 2025 jyldyń 1 qańtarynan bastap iske qosyp, 2026 jyly tolyq qalyptastyrý kózdelgen. Bul kezeńde memlekettik satyp alý kezinde «ST-KZ» standarty parraleldi qoldanylady.
Qujatta bul usynysqa «Atameken» ulttyq kásipkerlik palatasynyń qarsy bolyp otyrǵany da aıtylǵan. Túzetýler jobasy 29 qyrkúıekke deıin qoǵamdyq talqylaýda bolady.
