Memlekettik satyp alý salasynda konkýrstan tys rásimderge qoıylatyn talaptar kóteriledi
ASTANA. QazAqparat - Búgin Senattyń Ekonomıkalyq saıasat, ınnovatsııalyq damý jáne kásipkerlik komıtetiniń keńeıtilgen otyrysynda «Memlekettik satyp alýlar týraly» zań jobasy talqylandy.
Zań jobasynyń negizgi maqsaty memlekettik satyp alýlar erejesin jeńildetip, sybaılas jemqorlyq táýekelderin azaıtýdy qarastyrady. Sonymen qatar, qujatta yqtımal taýar jetkizýshilerdiń quqyqtary men zańdy múddelerin qorǵaý jáne memlekettik satyp alýǵa qatysatyn taraptardyń jaýapkershiligin arttyrý sharalary kózdelip otyr.
Sonymen qatar, memlekettik satyp alýdy ótkizý rásimderin jeńildetý sheńberinde aldyn ala biliktilik irikteýdi qoldana otyryp konkýrsty engizý, sondaı-aq konkýrs pen aýktsıondy ótkizý tártibin jeńildetý kózdelgen. Budan bólek, sybaılas jemqorlyq kórinisterin bolǵyzbaý maqsatynda zań jobasymen tehnıkalyq ózindik erekshelikterdi aldyn ala talqylaý ınstıtýty engiziledi. Konkýrstan tys rásimderge qoıylatyn talaptar kóteriledi. Al sharttar jasasýdyń, taýarlardy berý týraly elektrondyq júk qujattarynyń, oryndalǵan jumystar men qyzmetter kórsetý aktileriniń jáne elektrondyq shot-faktýralardyń tek qana elektrondyq formaty engiziledi.
Memlekettik satyp alý qorytyndylaryna shaǵym jasaý merzimderi belgilenip, sol ýaqyt aralyǵynda sharttar jasasýǵa jol berilmeıtin bolady. Sonymen qatar, zań jobasynda tapsyrys berýshiniń ne ónim berýshiniń memlekettik satyp alý týraly shart boıynsha mindettemelerdi oryndamaǵany úshin aıyppul sanktsııalary da belgilengen.
Komıtet senatorlary zań jobasyn palatanyń aldaǵy ýaqytta ótetin jalpy otyrysyna shyǵarý týraly sheshim qabyldady.
